Ոստիկանությունը շարունակում է հորդորել ՊՊԾ գունդը գրաված անձանց հեռու մնալ սադրանքներից, հանցագործությունից, ավելորդ արյունահեղությունից եւ մարդասպանությունից: Այս մասին այսօր` հուլիսի 17-ին, լրագրողների հետ զրույցում ասաց ՀՀ փոխոստիկանապետ Հունան Պողոսյանը:
«Նրանց պահանջը չի փոխվել, դեռեւս կան պատանդներ, որոնք ոստիկաններ են»,- ասաց Հունան Պողոսյանը` հրաժարվելով նշել, թե քանի զինված մարդ կա ներսում:
Փոխոստիկանապետը հերքեց մամուլում տեղ գտած լուրերը, թե Ժիրայր Սեֆիլյանին տեղափոխելու են Էրեբունիի ոստիկանության բաժանմունք` իր համախոհների հետ բանակցելու համար։ Ըստ Պողոսյանի, Սեֆիլյանին չեն բերել, իսկ հարցին՝ կա արդյոք նման նպատակ, փոխոստիկանապետը պատասխանել է. «Առայժմ ոչ»։
Հարցին, թե արդյոք ոստիկանության թերացումն էր, որ չի կանխվել տեղի ունեցածը, Հունան Պողոսյանը պատասխանեց, թե թերություններ բոլորն էլ ունեն եւ այժմ նպատակահարմար չէ այդ մասին խոսելը:
Նշենք, որ հուլիսի 17-ի առավոտյան մի խումբ զինված անձինք պատանդ են վերցրել ոստիկանության սահմանափակ թվով ծառայողների: Մեկ ոստիկան զոհվել է, եւս չորսը վիրավորվել: Ավելի ուշ հաղորդվել է, որ զոհված ոստիկանը նույն գնդի փոխհրամանատար Արթուր Վանոյանն է:
