Ոստիկանության պարեկապահակային գնդի վրա հարձակման հետեւանքով սպանված, ոստիկանության Երևան քաղաքի վարչության պարեկապահակետային գնդի հրամանատարի տեղակալ Արթուր Վանոյանն արդեն 20 տարուց ավելի աշխատում էր ոստիկանության համակարգում: Այս մասին հայտնում են ոստիկանության լրատվական ծառայությունից:
«Գնդապետը ծառայությունը ոստիկանության մարմիններում սկսել է 1995 թվականին՝ անցնելով օպերլիազորից ՊՊԾ գնդի հրամանատարի տեխնիկայի գծով տեղակալի ծառայողական ուղին: Գերազանց ծառայության համար արժանացել է երկու տասնյակ խրախուսանքների»,- ասվում է հաղորդագրության մեջ:
Արթուր Վանոյանն ամուսնացած էր, ունի երեք երեխա:
Սոցցանցերում տարածված տեղեկությունների համաձայն, վաղը պետք է կայանար սպանված գնդապետի որդու հարսանիքը։
Հիշեցնենք, որ հուլիսի 17-ի առավոտյան մի խումբ զինված անձինք Էրեբունիում գրոհով վերցրել են ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ՝ ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ոստիկանության ենթասպա Գագիկ Մկրտչյանը, օպերատոր Ռոբերտ Հայրապետյանը, նաեւ ՊՊԾ գնի գրոհին մասնակցած անձանցից մեկը։
