30 ժամից ավելի է անցել Երեւանի Խորենացի փողոցում տեղի ունեցած միջադեպից, որտեղ զինված խմբի անդամները ոստիկանության ՊՊԾ գնդում պատանդ են պահում մի քանի ոստիկանների: Այս պահին իրավիճակը հանգիստ է, արտառոց դեպքեր չեն գրանցվել:
Այսօր վաղ առավոտյան դեպքի վայր են ժամանել ՀՀ ոստիկանապետ Վովա Գասպարյանը եւ ԱԱԾ պետ Գեորգի Կուտոյանը, որոնք կարճ ժամանակ անց հեռացել են՝ չպատասխանելով լրագրողների հարցերին:
ԱԱԾ-ն հանդես է եկել հայտարարությամբ, նշելով, որ գիշերն ազատ են արձակվել երկու մարդ՝ մեկ ոստիկան եւ մեկ քաղաքացիական անձ: Նշվել է, որ զինված խումբը հրաժարվում է ազատ արձակել բռնությամբ պահվող այլ անձանց, այդ թվում՝ ոստիկանության բարձրաստիճան պաշտոնյաների, վայր դնել զենքերը եւ հանձնվել իշխանություններին: ԱԱԾ-ն հորոդորել է դադարեցնել զինված դիմադրությունը. «դրա համար դեռ կա ժամանակ եւ հնարավորություն»:
ՀՀ ոստիկանության պետի առաջին տեղակալ Հունան Պողոսյանը նշել է, որ այս պահին զինված խմբի ձեռքում կա 5 ոստիկան:
Խորենացի փողոցը առաջվա պես փակ է, մերթընդմերթ նկատվում է ոստիկանության մեքենաների ակտիվ շարժ։
