Այս պահի դրությամբ ՊՊԾ գնդում պատանդի կարգավիճակում կա հինգ ոստիկան։ Այս մասին այսօր՝ հուլիսի 18-ին, Խորենացի փողոցում լրագրողների հետ զրույցում հայտարարել է ՀՀ ոստիկանապետի առաջին տեղակալ Հունան Պողոսյանը։
Նրանց թվում են ՀՀ ոստիկանապետի տեղակալ Վարդան Եղիազարյանը եւ Երեւանի փոխոստիկանապետ Վալերի Օսիպյանը:
Հունան Պողոսյանը նախօրեին ազատ արձակված ոստիկանի ինքնության մասին որեւէ տվյալ չի նշել, միայն ասել է, որ նա պարեկապահակային ծառայության աշխատակից է, եւ նրան ազատ են արձակել համապատասխան բանակցությունների միջոցով։
Հունան Պողոսյանը վստահեցրել է, որ երկուստեք պահանջների առումով ոչինչ չի փոխվել. «Մեր եւ իրենց պահանջների առումով ոչինչ առայժմ չի փոխվել»։ Նա պնդել է, որ Ժիրայր Սեֆիլյանի հետ բանակցություններ չեն ընթանում։
Ոստիկանապետը նույնպես բանակցություններին չի մասնակցում. «Կա համապատասխան կոնտակտային սպա, որը բանակցում է ներսում գտնվող անձի հետ»։
Հունան Պողոսյանը հիշեցրել է իրենց պահանջը եւ նշել, որ փոխզիջումները պետք է լինեն երկուստեք. «Բանակցում ենք մի բանի շուրջ՝ հանձնել պատանդներին, դադարեցնել իրավիճակի հետագա սրումը եւ հանձնվել իշխանություններին։ Փոխզիջումների գնալու տարբերակը պետք է լինի երկուստեք, եթե իրենց կողմից լինի համապատասխան ադեկվատ քայլ, կլինի նաեւ մեր կողմից»:
