Թուրքիայում տեղի ունեցած իրադարձություններից տուժած ՀՀ քաղաքացիների համար ստեղծված թեժ գծին մի քանի տասնյակ քաղաքացիներից զանգեր են ստացվել: Այս մասին NEWS.am-ին հայտնեց ԱԳՆ մամուլի խոսնակ Տիգրան Բալայանը:
«20-30 զանգ ենք ստացել: Մի քաղաքացու դուստրը Թուրքիայից պետք է վերադառնար, գտել ենք, կապ ենք հաստատել: Քաղաքացիներ էլ կային, հարցնում էին՝ ճամփորդություն են պլանավորել, գնան, թե չէ, մենք էլ խորհուրդ ենք տվել, որ զերծ մնան խոշոր քաղաքներ այցելելուց»,- ասաց նա:
Տիգրան Բալայանը նշեց, որ բացի այդ՝ նաեւ մեծ թվով նամակներ են ստացել սոցիալական ցանցերի միջոցով:
Հիշեցնենք, որ տուժած քաղաքացիները կարող են զանգել հետեւյալ հեռախոսահամարով՝ +374 60 620552:
Հիշեցնենք, որ հուլիսի 15-ի լույս 16-ի գիշերը մի խումբ զինվորականներ Թուրքիայում հեղաշրջման փորձ արեցին, որը, սակայն, տապալվեց: Բախումների ընթացքում ավելի քան 260 մարդ է զոհվել:
