Ոստիկանության պարեկապահակային ծառայության գնդի մոտակայքում հուլիսի 19-ին տեղի ունեցած միջադեպի հետեւանքով տուժածներն ամբուլատոր բուժօգնություն են ստացել:
Ինչպես հայտնում են Առողջապահության նախարարության լրատվական ծառայությունից, Սարի թաղից տարբեր վնասվածքներով 5 տուժած տեղափոխվել է «Էրեբունի» բժշկական կենտրոն, որտեղ անհրաժեշտ բժշկական օգնություն ստանալուց հետո բոլորը տուն են գնացել։ Ամբուլատոր պայմաններում եւս 2 տուժած անհրաժեշտ բուժօգնություն է ստացել «Սուրբ Գրիգոր Լուսավորիչ» ԲԿ-ում, 1-ը` ՊՆ կենտրոնական զինվորական հոսպիտալում։
Նշենք, որ ըստ Քննչական կոմիտեի տարածած հաղորդագրության, կիրառված բռնությունների հետեւանքով տարբեր մարմնական վնասվածքներով բուժօգնության է տեղափոխվել ոստիկանության 6 աշխատակից։ Ստացվում է, որ Սարի թաղում տեղի ունեցած միջադեպի հետեւանքով նաեւ երկու քաղաքացի է տուժել:
Ավելի վաղ NEWS.am-ը հայտնել էր, որ նախօրեին բախում է տեղի ունեցել ոստիկանների ու քաղաքացիների միջեւ: