Հայաստանի եւ Ադրբեջանի նախագահներ Սերժ Սարգսյանը եւ Իլհամ Ալիեւը համաձայնության են եկել Ղարաբաղում շփման գծում եւ հայ–ադրբեջանական սահմանին ԵԱՀԿ մոնիթորինգային խմբի ընդլայնման հարցի շուրջ։ Այս մասին «ՌԻԱ Նովոստի»–ին ասել է ԵԱՀԿ ՄԽ ամերիկացի համանախագահ Ջեյմս Ուորլիքը։
«ԵԱՀԿ ՄԽ համանախագահներն ակտիվ աշխատում են Վիեննայում եւ Պետերբուրգում հանդիպումների ժամանակ ստանձնած պարտավորությունների իրականացման ուղղությամբ, որոնց նպատակն է թուլացնել լարվածությունը եւ հետագա առաջընթաց գրանցել հակամարտության խաղաղ կարգավորման գործընթացում։
Նախագահները համաձայնության են եկել շփման գծում եւ հայ–ադրբեջանական սահմանին ԵԱՀԿ մոնիթորինգային խմբի ընդլայնման հարցում։ Պլանավորվում է շարունակել հակամարտության կարգավորման ընդլայնված բանակցությունները՝ յուրաքանչյուր կողմից բարձրաստիճան պաշտոնական անձանց մասնակցությամբ։ Դիվանագիտական ուղղությամբ առաջընթացն անհրաժեշտ է կողմերի միջեւ լարվածության թուլացման համար»,– ասել է Ուորլիքը։
