Երեւանի Խորենացի փողոցում առանց դադարի մարդ բերման ենթարկող ոստիկանները քիչ առաջ բերման են ենթարկել կանադահայ դերասանուհի Արսինե Խանջյանին՝ հայտնի ռեժիսոր Ատոմ Էգոյանի կնոջը։
NEWS.am-ի թղթակիցը հայտնում է, որ երկու կարմիրբերետավորներ փորձում էին բռնել դերասանուհու ձեռքերից եւ նրան տանել ներս ոստիկանական արգելապատնեշից։ Նիկոլ Փաշինյանը միջամտեց, ոստիկաններին տեղեկացրեց, թե ում են բերման ենթարկում։ Ոստիկանները մի պահ հեռացան, սակայն կարճ ժամանակ անց բերման ենթարկեցին աշխարհահռչակ դերասանուհուն։
Ոստիկանները բերման են ենթարկում անխտիր բոլորին, ովքեր հայտնվում են Խորենացի փողոցում։ Բերման են ենթարկել «Ժառանգություն» կուսակցության անդամներ Դավիթ Սանասարյանին, Արմեն Մարտիրոսյանին, «Հայազն» կուսակցության անդամ Արմեն Մկրտչյանին, «Արձագանք» ստուդիայի հիմնադիր Եղիշե Պետրոսյանին։
ԱԺ պատգամավոր Նիկոլ Փաշինյանը փորձում էր ոստիկաններից պարզաբանումներ ստանալ նրանց ապօրինի գործողությունների կապակցությամբ, սակայն որեւէ ոստիկան այդպես էլ չպարզաբանեց։