Նախքան Թուրքիայում ռազմական հեղաշրջումը Անկարան մտադիր էր վերանայել Հայաստանի հետ հարաբերությունների կարգավորման գործընթացը ձգձգելու քաղաքականությունը։ Այս մասին հուլիսի 28-ին՝ «Թուրքիայում անհաջող ռազմական հեղաշրջում. դրա հետեւանքները հայ–թուրքական հարաբերությունների համար» թեմայով քննարկման ժամանակ, ասել է Տարածաշրջանային հետազոտությունների կենտրոնի ղեկավար Ռիչարդ Կիրակոսյանը։
Նրա խոսքով՝ դա պայմանավորված է եղել երկու գործոնով՝ Իսրայելի հետ հարաբերությունների կարգավորմամբ եւ ամենակարեւորը, Մոսկվայի հետ հարաբերությունների վերականգնմամբ։ «Նախքան հեղաշրջումը շրջանառվում էր գաղափարը, որ պետք է օգտվել Մոսկվայի հետ աշխատելու հնարավորությունից Հայաստանի վրա ճնշում գործադրելու առումով, որի նպատակն էր, ամենայն հավանականությամբ, երկու շրջան հանձնել Ադրբեջանին։ Դա նաեւ պետք է արտահայտվեր Անկարայում հեղաշրջումից 2 օր հետո նախատեսված ԵԱՀԿ Մինսկի խմբի հանդիպմանը»,– նշել է Կիրակոսյանը։ Նրա համոզմամբ՝ այստեղ առանցքայինը կլինի Մոսկվայի ներգրավվածությունը։
Փորձագետը նշել է, որ Հայաստանը պետք է ուշադրություն դարձնի ոչ միայն նրան, թե ինչ է տեղի ունենում անմիջականորեն Թուրքիայում, այլ նաեւ Լեռնային Ղարաբաղի հարցում ճնշման եւ Հայաստանի հետ հարաբերությունների կարգավորման գործընթացին նորից ներգրավվելու Թուրքիայի ցանկության վրա։ «Ցավոք, Հայաստանը այս փուլում այնքան էլ լավ չի պատրաստված։ Ներքին վիճակի պատճառով ՀՀ նախագահը՝ որպես հայտնի շախմատիստ, չեղարկել է խաղը։ Իսկ շատ դեպքերում դա կարող է դառնալ հերթական բաց թողած հնարավորությունը»,– եզրափակել է Կիրակոսյանը։