Հատուկ քննչական ծառայությունը սկսել է մեկը մյուսի հետեւից մեղադրանք առաջադրել հուլիսի 31–ին զենքերը վայր դրած «Սասնա ծռեր» խմբի անդամների նկատմամբ, այսօր արդեն դատարանը նրանցից մի քանիսի նկատմամբ կալանքի որոշում է կայացրել։ Այս պահի դրությամբ խմբի անդամներին հիմնականում մեղադրանք է առաջադրվել երկու հոդվածներով՝ պատանդ վերցնելը, որի համար նախատեսվում է 8–15 տարվա ազատազրկում, եւ ապօրինի կերպով զենք, ռազմամթերք, պայթուցիկ ներ ձեռք բերելու եւ պահելու հոդվածով, որով նախատեսվում է ազատազրկում՝ 3–8 տարով։

Չնայած «Սասնա ծռերի» տղաներին հանրային պաշտպաններ են տրամադրվել, մոտ մեկ տասնյակ հայտնի փաստաբաններ իրենց նախաձեռնությամբ ձեւավորել են խումբ, որը զբաղվելու է նրանց իրավունքների պաշտպանությամբ։

Իրենց հերթին, մի խումբ քաղաքացիներ դրամահավաք են սկսել «Սասնա ծռեր» խմբի անդամներ Պավլիկ եւ Արամ Մանուկյանների ընտանիքին աջակցելու նպատակով։ Ազատության հրապարակում ընթացող դրամահավաքը շարունակվելու է մինչեւ օգոստոսի 3-ը, ժամը  23:00-ն: Արայիկ Խանդոյանի ընտանիքին օգնելու համար էլ Gofundme.com կայքում մեկնարկած դրամահավաքի ընթացքում մեկ օրում շուրջ 30 հազար դոլար է հավաքվել։

Այսօր դատարանը 2–ամսյա կալանքի որոշում է կայացրել հուլիսի 29-ի Սարի թաղի դեպքերի հետ կապված ձերբակալված Արմեն Մարտիրոսյանի, Դավիթ Սանասարյանի, Հովսեփ Խուրշուդյանի եւ Անդրիաս Ղուկասյանի նկատմամբ։ Նրանք մեղադրվում են զանգվածային անկարգություններ կազմակերպելու մեջ, ինչը նախատեսում է ազատազրկում 4–10 տարի ժամկետով։

Ընդ որում, Դավիթ Սանասարյանի փաստաբանը հայտարարել է, որ դատարանում նրա ինքնազգացողությունը վատացել է, քանի որ երիկամների խնդիր ունի պարտադիր պետք է հետազոտվի։ Այս պահին «Սասնա ծռեր» խմբի անդամներից 2–ը հիվանդանոցում են, չորսը՝ դատապարտյալների հիվանդանոցում։

Երեւանի Խորենացի փողոցում եւ Սարի թաղում հուլիսի 29-ին ոստիկանության կողմից բողոքի ցույցը ուժով ցրելու հետևանքով տուժած 19 քաղաքացի շարունակում է մնալ հիվանդանոցներում։

Հավաքը ցրելու հետեւանքով ձախ աչքը կորցրած 17–ամյա Սայաթ Հարությունյանը առաջիկա օրերին դուրս կգրվի հիվանդանոցից։ NEWS.am–ի թղթակցի հետ զրույցում Սայաթը պատմել է՝ ինչպես է դեպքը տեղի ունեցել։

Հիվանդանցում այսօր մահացել է հուլիսի 30-ին Բաղրամյան պողոտայում «Սասնա ծռերի» աջակցության ցույցի ժամանակ ինքնահրկիզման փորձ կատարած Քաջիկ Գրիգորյանը։ 50–ամյա տղամարդու վերին շնչուղիների 15 եւ մարմնի մակերեսի 55  տոկոսն այրվել էր:

Ռուսաստանում դատարանը մեղավոր է ճանաչել Տուլայում վթարի ենթարկված Մոսկվա-Երեւան երթուղու ավտոբուսի հայ վարորդին։  45-ամյա Գառնիկ Հարությունյանը դատապարտվել է 4,5 տարվա ազատազրկման։ Անցյալ տարվա նոյեմբերի 3-ի վթարի հետեւանքով զոհվել էր 9 մարդ, բոլորը՝ Հայաստանի քաղաքացիներ։ Վարորդը մեղադրվում էր ճանապարհային երթեւեկության կանոնները խախտելու մեջ, որն անզգուշաբար մահ է առաջացրել։

Վլադիմիր Ժիրինովսկին այլեւս չի ցանկանում ռմբակոծել Ստամբուլը, հիմա էլ անցել է Հայաստանին։ Մեկնաբանելով ՊՊԾ գնդի գրավման հետ կապված իրադարձությունները՝ Ժիրինովսկին ասել է՝ «Հայաստանի համար չարժե անհանգստանալ: Նրանք երբեք մեզնից չեն հրաժարվի, որովհետեւ այդ դեպքում նրանց վերջը կգա. Ադրբեջանը անմիջապես կգրավի Լեռնային Ղարաբաղը, իսկ թուրքերը կօգնեն նրանց»: Նրա խոսքով՝ Հայաստանը փոքրիկ, լեռնային երկիր է, որը ոչ մի հեռանկար, տնտեսություն չունի եւ որտեղ արդեն մեկ միլիոն հայ է մնացել, իսկ ռուսական բազան Հայաստանի փրկությունն է, որը Ռուսաստանը հետ կվերցնի, եթե Հայատանում, ինչպես է Ժիրինովսկին է արտահայտվել, թքեն ռուսների վրա։

Ողբերգական վթար է տեղի ունեցել Լոռիում։ Վանաձոր-Դիլիջան ավտոճանապարհին բախվել են Toyota եւ ՎԱԶ 21 099 մակնիշի ավտոմեքենաները, ինչի հետեւանքով երեք մարդ է մահացել՝ 23–25 տարեկան երիտասարդ տղաներ։

Դոլարն այսօր էժանացել է, իսկ ռուբլին, եվրոն ու ֆունտը՝ թանկացել: Դոլարի փոխարժեքը կազմել է 476, ռուբլունը՝ 7.14, եվրոյինը՝ 532, իսկ ֆունտինը՝ 629 դրամ: 

Օգոստոսի 3-4-ը օդի ջերմաստիճանը կբարձրանա 2-3 աստիճանով: Առաջիկա գիշերը մայրաքաղաքում սպասվում է +17+19, իսկ վաղը ցերեկը՝ +32+34 աստիճան տաքություն։