Թուրքիայի Անթալիա քաղաքում անցկացվող «Ոսկե նարինջ» միջազգային կինոփառատոնին որպես ժյուրի հրավիրված հայտնի սերբ կինոռեժիսոր Էմիր Կուստուրիցան կատաղել է իր նկատմամբ թուրք արվեստագետների եւ քաղաքական գործիչների հայտարարություններից եւ լքել Թուրքիան:
Մինչ մեկնելը, Կուստուրիցան մամուլի ասուլիս է տվել, որի ժամանակ խիստ քննադատել է Թուրքիայի մշակույթի նախարարին, ով հայտարարել էր, թե Կուստուրիցայի պատճառով չի մասնակցի կինոփառատոնին: Կուստուրիցան նշել է, թե Թուրքիայի մշակույթի նախարարին համարում է թշնամի` նման վարվելակերպի համար: «Ամիսներ առաջ Բուրսա քաղաքում կազմակերպված միջոցառման ժամանակ մշակույթի նախարարի համակուսակից Բուրսայի քաղաքապետը ինձ շնորհակալություն էր հայտնել, գրկախառնվել եւ համբուրել: Այս 1,5 ամսվա մեջ ինչ եղավ, որ նախարարը հայտարարում է, թե Կուստուրիցան կա, ինքը չի մասնակցի: Դա խայտառակություն է եւ մեծ սկանդալ»- նշել է կինոռեժիսորը:
Կուստուրիցան խիստ է պատասխանել նաեւ հայտնի թուրք ռեժիսոր Սեմիհ Քափլանօղլուին, ով հայտարարել էր, թե հանում է իր ֆիլմը մրցույթից, քանի որ Կուստուրիցան ժյուրի է: «Եթե Քափլանօղլուն ցեղասպանությունների նկատմամբ այդքան զգայուն է, ինչո՞ւ չի խոսում Առաջին Համաշխարհային պատերազմի ժամանակ հայերի նկատմամբ իրականացված ցեղասպանությունից: Դրանով նա կամբողջացներ մարդկության դեմ իրականացրած հանցանքների իր զգայունությունը: Ես միշտ էլ հայտնել եմ իմ վերաբերմունքը Բոսնիայում մարդկության դեմ իրականացված հանցանքների մասին: Իմ ազգն էլ է դեմ եղել այդ հանցանքներին: Միեւնույն ժամանակ Բոսնիայում էլ են մեծ թվով սերբեր սպանել»-նշել է Կուստուրիցան:
Նշենք, որ «Ոսկե նարինջ» փառատոնի կազմակերպիչների կողմից Կուստուրիցային ուղարկված հրավերը դժգոհություն է առաջ բերել կինոյի մի շարք գործիչների, ռեժիսորների եւ Բոսնիայի կանանց մի շարք հասարակական կազմակերպությունների ներկայացուցիչների մոտ՝ կապված սերբամետ հայացքների հետ, որ Կուստուրիցան ուներ նախկին Հարավսլավիայում:
Ի նշան Կուստուրիցայի մասնակցության դեմ բողոքի՝ թուրք հայտնի ռեժիսոր Սեմիհ Քափլանօղլուն ցուցադրությունից հանել է իր «Մեղր» ֆիլմը։ Փառատոնի կազմակերպիչների հասցեին իրենց քննադատությունն են հնչեցրել նաեւ թուրք մի շարք մշակութային, քաղաքական եւ հասարակական գործիչներ։
«Ոսկե նարինջ» փառատոնը կազմակերպել է Անթալիայի քաղաքապետարանը։ Այն կանցկացվի հոկտեմբերի 9-14-ը։