«Բանանց» ֆուտբոլային ակումբի մարզահամալիրում օգոստոսի 6-ին տեղի ունեցավ լեգենդար «Արարատ 73»-ի ավագ եւ «Բանանց» ֆուտբոլային ակումբի նախկին գլխավոր մարզիչ ու փոխնախագահ Հովհաննես Զանազանյանի արձանի բացման հանդիսավոր արարողությունը:
Արարողությանը ներկա էին Հովհաննես Զանազանյանի թիմակիցները «Արարատից»՝ Էդուարդ Մարկարովը, Ալյոշա Աբրահամյանը, Սերգեյ Պետրոսյանը, ՀՖՖ նախագահ Ռուբեն Հայրապետյանը, «Բանանց» ակումբի բաժնետերեր Օլեգ Մկրտչյանն ու Ջեւան Չելոյանցը, Հովհաննես Զանազանյանի ընտանիքի անդամները: Հուշարձանի հեղինակը քանդակագործ Մհեր Մնացականյանն է:
Արձանի պատվերը ստացվել է դեռեւս մարտին: Քանդակագործը նախապես երեք էսքիզ է ներկայացրել. Զանազանյանը՝ փոխանցիկ դրոշով, Զանազանյանը՝ գավաթը ձեռքին, եւ նրա լավագույն լուսանկարներից մեկի մոտիվներով՝ Զանազանյանը՝ ոտքը գնդակին հենած: Արդյունքում ընտրվել է երրորդ տարբերակը: Արձանի բարձրությունը 171 սմ է՝ Զանազանյանի հասակով:
Ըստ քանդակագործի՝ փորձել է լեգենդար ֆուտբոլիստի հայացքից մինչեւ հագուստի ծալքերը համապատասխանեցնել լուսանկարի հետ: «Բանանց» ֆուտբոլային ակումբի բաժնետերերից Ջեւան Չելոյանցի խոսքով՝ սա ոչ թե պարզապես արձան է, այլ յուրահատուկ խորհրդանիշ:
«Որքան շատ հիշենք այն մարդկանց, որոնք փառք են բերել այս երկրին, այնքան ավելի լավ կլինի այս երկրի համար: Լավ կլինի, եթե մեր հիշողությունը չքնի: Կարճ ժամանակ է, ինչ կապ ունեմ այս ակումբի հետ: Ուզում եմ ասել, որ այն ամենը, ինչ այստեղ անում եմ, հաճույքով եմ անում: Առանց հաճույք ստանալու անհնար է մեծ բան անել: Չեմ ուզում ասել, որ Հայաստանում աշխատելը հեշտ է. այդպես չէ: Հեշտ չէ, բայց եթե ցանկանում ես մի փոքր երջանկություն պարգեւել քո ժողովրդին, պարտավոր ես անել այն: Ես դա ասում եմ ամեն տեղ: Եթե դու հայ ես, պարտավոր ես ինչ-որ բան անել քո ժողովրդի համար»,- ասաց Չելոյանցը:
«Արարատի» լեգենդար ավագ Հովհաննես Զանազանյանը կյանքից հեռացավ 2015-ի հոկտեմբերին, 68 տարեկանում, երկարատեւ հիվադությունից հետո:
Վերա Մարտիրոսյան