«Սասնա ծռերի» հետ Վիտալի Բալասանյանի հեռախոսազրույցի ձայնագրությունը, որը հրապարակել է «Հիմնադիր խորհրդարանը», մոնտաժված է։ Այս մասին NEWS.am–ի հետ բացառիկ հարցազրույցում ասել է ԱԺ պատգամավոր Վիտալի Բալասանյանը, որը ՊՊԾ գնդի գրավումից հետո «Սասնա ծռերի» եւ իշխանությունների միջեւ միջնորդական առաքելություն էր իրականցնում։ Բալասանյանը վստահեցրել է, որ ձայնագրության այն հատվածը, որում ինքը խոսում է Ժիրայր Սեֆիլյանի հետ հանդիպելու՝ Սերժ Սարգսյանի պատրաստակամության մասին, արվել է հուլիսի 20–ին, սակայն ներկայացվել է որպես հուլիսի 29–ի խոսակցություն։
«Սասնա ծռերի» անդամներին հուլիսի 26-ին իր մեքենայով ՊՊԾ գունդ սնունդ հասցրած Արթուր Սարգսյանն այսօր դարձավ 48 տարեկան: Հարազատներն ու ընկերները հավաքվել էին «Նուբարաշեն» ՔԿՀ-ի մոտ՝ նրա ծնունդը շնորհավորելու: Հարազատներն ու ընկերները «Հաց բերող Արթուրի ծննդյան առթիվ» գրառումով տորթը փոխանցեցին Արթուրին:
Սարի թաղում հուլիսի 29-ի միջադեպի գործով կալանավորված Գարիկ Առուստամյանի հարազատներն ու համագյուղացիները սպառնում են փակել Մասիս-Էջմիածին ավտոճանապարհը, եթե Գարիկի խափանման միջոցը 2 օրվա ընթացքում չփոխվի: Գյուղացիներն անհիմն են համարում զանգվածային անկարգությունների ժամանակ բռնություն գործադրելու մեղադրանքով Գարիկին կալանավորելը։ Նրանք այսօր բողոքի ակցիա էին անցկացնում Նիզամի գյուղում: Գարիկը, հարազատների պատմելով, ընկերոջ հետ գնացել է քրոջը բերելու Սարի թաղից, երբ երեքով հայտնվել են իրադարձությունների կենտրոնում եւ հարձակման ենթարկվել ոստիկանների կողմից: Գարիկը դրանից հետո 2 օր անցկացրել է Վերակենդանացման բաժանմունքում:
«Դատապարտյալների հիվանդանոց» ՔԿՀ–ում գտնվող՝ «Սասնա ծռերի» անդամ, նկարիչ Աշոտ Պետրոսյանը նախօրեին հանդիպել է կոմպոզիտոր Տիգրան Մանսուրյանի հետ եւ դադարեցրել 4 օր առաջ սկսած հացադուլը: Կոմպոզիտորն ու Աշոտ Պետրոսյանը զրուցել են մոտ 2 ժամ: Ավելի վաղ տեղեկացրել էինք, որ Աշոտ Պետրոսյանը, որ հրազենային վնասվածք ունի, ցանկանում է հանդիպել կոմպոզիտորներ Տիգրան Մանսուրյանի եւ Ռոբերտ Ամիրխանյանի հետ: Նա օգոստոսի 4-ից հայտարարել էր հացադուլ եւ հրաժարվել բուժօգնությունից:
«Էլեկտրիկ Երեւանից» մեկ տարի անց 4 ոստիկանի մեղադրանք է առաջադրվել լրագրողների մասնագիտական գործունեությանը խոչընդոտելու, լրագրողների տեխնիկան փչացնելու համար: Հիշեցնենք, որ «Էլեկտրիկ Երեւանում» տեղի ունեցած բռնությունների հետեւանքով բերման էր ենթարկվել NEWS.am-ի ֆոտոլրագրող Արսեն Սարգսյանը, իսկ թղթակից Աիդա Հովհաննիսյանից խլել էին տեսախցիկը:
Ռուս-թուրքական հարաբերությունների 8-ամսյա «սառեցումից» հետո, որը սկսվել էր թուրքական զինուժի կողմից ռուսական Սու-24 ինքնաթիռի խոցման հետեւանքով, այսօր Սանկտ- Պետերբուգում առաջին անգամ տեղի է ունեցել Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումը: Հանդիպման ընթացքում Պուտինը դատապարտել է Թուրքիայում ռազմական հեղաշրջման փորձը՝ հայտարարելով, որ Ռուսաստանը մշտապես դեմ է եղել ցանկացած ոչ սահմանադրական գործողություններին: Էրդողանը հայտարարել է, որ ռուս-թուրքական հարաբերությունները մտել են դրական հուն:
Խոշոր հրդեհ է բռնկվել Գյումրիում: Դեռեւս չպարզված հանգամանքներում բռնկված հրդեհի հետեւանքով տուժել է 7 ընտանիք, մի մասի տները բնակության համար այլեւս պիտանի չեն, այրվել է ամբողջ գույքը։ Բնակիչները հայտնվել են անելանելի վիճակում։ Առայժմ հայտնի չէ հրդեհի բռնկման պատճառը, բնակիչները կասկածում են, որ հնարավոր է՝ այն հոսանքալարերի բռնկումից է սկսվել։ Բնակիչների խոսքով՝ հրդեհն այդքան շատ է տարածվել այն պատճառով, որ հրշեջ մեքենաներն անսարք են եղել, իսկ հրշեջները չեն կողմնորոշվել՝ ինչ անել։
Մահացած ծննդկան Մերի Մարգարյանի հոսպիտալացումը եղել է ուշացած։ Նման եզրակացության է հանգել Առողջապահության նախարարության մասնագիտական հանձնաժողովը ներքին քննության արդյունքում: Ըստ եզրակացության՝ 26-ամյա ծննդկանին պետք էր արագ ծննդալուծում կեսարյան հատման ճանապարհով: Միեւնույն ժամանակ, հանձնաժողովը հակասություններ է հայտնաբերել «Շենգավիթ» եւ «Էրեբունի» բժշկական կենտրոնների իրականացրած հետազոտությունների միջեւ: Մասնավորապես, «Շենգավիթում» Մերի Մարգարյանի թոքերում փոփոխություն չի հայտնաբերվել, իսկ «Էրեբունի»-ում ախտորոշվել է երկկողմանի թոքաբորբ:
Ռիոյի Օլիմպիական խաղերի չեմպիոն է դարձել Ռուսաստանը ներկայացնող հայազգի սուսերամարտիկ Յանա Եգորյանը: Թրամարտի անհատական պայքարի եզրափակիչում 22-ամյա մարզուհին պարտության է մատնել ռուսաստանցի Սոֆյա Վելիկայային: 1993 թվականին Երեւանում ծնված եւ 6 տարեկանում ընտանիքի հետ Ռուսաստան տեղափոխված Յանա Եգորյանը նաեւ 2015թ. աշխարհի չեմպիոն է, Եվրոպայի քառակի չեմպիոն, սակայն այդ տիտղոսները նվաճել է Ռուսաստանի հավաքականի հետ թիմային պայքարում:
Ռիոյի Օլիմպիական խաղերի հրաձգության մրցաշարում Հայաստանի միակ ներկայացուցիչ Հրաչ Բաբայանը հանդես եկավ օդամուղ հրացանի 10 մետրի որակավորման փուլում: 20-ամյա մարզիկը 50 մասնակիցների մեջ գրավեց 21-րդ տեղը։ Օլիմպիական ոսկին նվաճեց իտալացի Նիկոլո Կամպարին։
Դոլարն ու ռուբլին աննշան են աճել են, եվրոն ու ֆունտը՝ նվազել: Դոլարի փոխարժեքը կազմել է 476, ռուբլունը՝7.37, եվրոյինը՝ 528, ֆունտինը՝ 618 դրամ:
Երեւանում օգոստոսի 10-ին սպասվում է առանց տեղումների եղանակ: Առաջիկա գիշերը մայրաքաղաքում օդի ջերմաստիճանը կհասնի +22-ի, իսկ վաղը ցերեկը՝ +37-ի: