Սլովենիան Հայաստանում ավելի շատ հայտնի է կենցաղային տեխնիկայի Gorenje ապրանքանիշով։ Հազիվ թե հայերս Սլովենիայի մասին գիտենք ավելին, բացի թերեւս նրանից, որ այն նախկին Հարավսլավիայից անկախացած հանրապետություններից է։ Նմանապես Սլովենիայում Հայաստանը հայտնի է ավելի շատ իր կոնյակով, քան պատմությամբ եւ ժամանակակից մարտահրավերներով։ Սլովենիայի նախագահի փոքր-ինչ անսպասելի այցը երկու ժողովուրդների մերձեցման հրաշալի հնարավորություն է։
Քիչ առաջ ավարտվեց հայ-սլովենական բիզնես-ֆորումը, որին մասնակցեցին 2 երկրների նախագահները՝ Սերժ Սարգսյանն ու Դանիլո Թյիրքը։ Նրանց մասնակցությունը գործնականում ի չիք դարձրեց բիզնես-ֆորումի օրակարգը, քանի որ նախագահների ելույթներից հետո օրակարգը փաստացի սպառվեց, թեեւ նախորդ նմանատիպ ֆորումներն ընթացել են այլ սցենարով։ Սակայն լրագրողների համար 2 նախագահների ելույթներն էլ բավական հագեցած էին, իսկ հայ եւ սլովակ գործարարները շփման թերեւս ավելի արդյունավետ ձեւեր գտնեն, քան փոխադարձաբար իրենց երկրների տնտեսական միջավայրերը գովելն է։
Հայաստանի նախագահն ասաց, որ 2 երկրների միջեւ արդեն ստորագրվել է 4 համաձայնագիր, որոնցից երկուսը տնտեսական բնույթի են՝ երկակի հարկումից խուսափելու եւ տնտեսական համագործակցության մասին։ Տնտեսության նկատմամբ նման ուշադրությունը պատահական չէ։ Հայաստանի նախագահը հույս ունի, որ հենց տնտեսական կապերի ամրապնդումը կմերձեցնի 2 ժողովուրդներին եւ խթան կհանդիսանա այլ կապերի զարգացման համար։ «Տնտեսական շահերն այսօր ավելի քան երբեւէ որոշիչ գործոն են երկկողմ հարաբերություններում։ Կան դեպքեր, երբ տնտեսական համագործակցությունը օգնել է պատմական խնդիրներ ունեցող երկրների մերձեցմանը»,- ասաց Ս. Սարգսյանը։
Սլովենիայի նախագահ Դ. Թյիրքը նշեց մի քանի ոլորտներ, որտեղ, ըստ նրա, կարող է ծավալվել հայ-սլովենական արդյունավետ համագործակցություն։ Առաջին հերթին դա տեղեկատվական տեխնոլոգիաներն են։ Երկրորդը ընդգծվեց զբոսաշրջությունը։ Ըստ Թյիրքի՝ եթե համապատասխան մեխանիզմներ ստեղծվեն, ապա բազմաթիվ սլովենացիներ կայցելեն Հայաստան։