Ռուսաստանը կատարում է Հայաստանին սպառազինությունների մատակարարման իր պարտավորությունները: Օգոստոսի 10-ին Հայաստանի նախագահ Սերժ Սարգսյանի հետ ունեցած համատեղ մամուլի ասուլիսում այս մասին հայտարարել է ՌԴ նախագահ Վլադիմիր Պուտինը՝ պատասխանելով Հայաստանին եւ Ադրբեջանին զենք մատակարարելու մասին հայ լրագրողի հարցին:
«Ինչ վերաբերում է սպառազինություններին, ապա մենք Հայաստանի հետ աշխատանքի ծրագիր ունենք: Հայաստանը ՀԱՊԿ-ի անդամ է եւ մեր դաշնակիցը, մենք փոխադարձ պարտավորություններ ունենք, եւ Ռուսաստանը միշտ հետեւում է իր պարտավորություններին եւ կատարում դրանք»,- ասել է Պուտինը:
Նա հավելել է, որ սպառազինությունների ժամանակակից շուկայում ցանկացած երկիր կարող է գնել գրեթե ցանկացած զենք: «Եվ, ասենք, այնպիսի երկիր, ինչպիսին Ադրբեջանն է՝ նավթային, արագ զարգացող տնտեսությամբ, ոսկեարժութային մեծ պահուստներով երկիր, իհարկե, կարող է զենք գնել՝ որտեղ ասես»,- ասել է Պուտինը:
ՏԱՍՍ-ի փոխանցմամբ՝ նա, միաժամանակ, ընդգծել է, որ անհրաժեշտ է գոյություն ունեցող խնդիրները լուծել խաղաղ ճանապարհով:
