Ուժեղ քամու հետեւանքով գյուղացիներին պատճառված վնասը ուռճացնելով պաշտոնական դիրքը չարաշահելու մեջ մեղադրվող` Արզականի գյուղապետը ընդունել է իրեն առաջադրված մեղադրանքը, սակայն իրեն մեղավոր չի համարում:
«Ընդունել եմ, որ ավելի քիչ հնչեղություն ունենա, շուտ վերջանա գործը, որ խնդիրները վերջնական լուծվեն»,- NEWS.am-ի հետ զրույցում ասաց գյուղապետ Նորիկ Մովսեսյանը:
Ըստ նախաքննական մարմնի` նախորդ տարվա նոյեմբերին քամու վնասի չափերը ճշտող հանձնաժողովը գյուղապետի նախագահությամբ պատճառված վնասի իրական ծավալներն ուռճացրել է եւ դրանց հիման վրա կազմել հավելագրված տվյալներով կեղծ ակտեր: Դրանց հիման վրա սատցել է փոխհատուցումը, բաժանել 34 բնակիչների մեջ, ապա իր տեղակալին հանձնարարել բնակիչներից հավաքել է գումարներ՝ փոխհատուցման ցուցակում չըդնգրկված, սակայն քամուց տուժած գյուղացիներին փոխանցելու պատրվակով:
Գյուղապետի խոսքով` ինքը միայն ցանկացել է գումարը հավասարապես բաշխել բնակիչների մեջ, քանի որ երկու օրում չի հաջողվել բոլոր գյուղացիների կրած վնասներն ընդգրկել ցուցակներում:
«Ունեցել ենք սխալներ, բացթողումներ, որոնք հետագայում դիտվել են որպես միտումնավոր սխալ: Արդարացի փորձեցինք բաշխում անել, որը, հասկանում ենք, սխալ էր, այց այլընտրանք չունեինք»,- ասաց գյուղապետը:
Արզական համայնքի ղեկավար Ն. Մովսեսյանին եւ նրա տեղակալ Պ. Խաչատրյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին եւ 314-րդ հոդվածի 1-ին մասերով: Վերջիններս առաջադրված մեղադրանքում իրենց մեղավոր են ճանաչել։ Պետությանը պատճառված վնասն ամբողջությամբ վերականգնվել է։
Նրանց նկատմամբ որպես խափանման միջոց է ընտրվել ստորագրություն չհեռանալու մասին: