Պուտինի հետ հանդիպումից հետո Սերժ Սարգսյանը երեկ ուշ երեկոյան աշխատանքային այցով մեկնել է Բրազիլիա: Նախագահը կսատարի Ռիոյում 31-րդ ամառային օլիմպիական խաղերին մասնակցող Հայաստանի օլիմպիականներին: Միաժամանակ, Սերժ Սարգսյանը պաշտոնական հանդիպումներ կունենա երկրի ղեկավարության հետ:
«Հիմնադիր խորհրդարանի» նախագահ Ժիրայր Սեֆիլյանի գործը միացվել է «Սասնա ծռեր» խմբի քրեական գործին: Սեֆիլյանը կալանավորվել էր դեռեւս հունիսի 22-ին, նա մեղադրվում էր ապօրինի զենք, զինամթերք եւ պայթուցիկ նյութեր ձեռք բերելու եւ իրացնելու մեջ: Թե ինչ է սպասվում Սեֆիլյանին գործերի միավորումից հետո, պարզ չէ: Փաստաբանը երեկվանից հեռախոսազանգերի չի պատասխանում:
«Սասնա ծռեր» խմբի անդամներ Վարուժան Ավետիսյանին եւ Պավել Մանուկյանին նոր մեղադրանք է առաջադրվել: Նրանց նախկին մեղադրանքներին ավելացել է եւս մեկը՝ նախորդ տարվա ապրիլի 24-ին զանգվածային անկարգություններ կազմակերպելը: Նշենք, որ ապրիլյան դեպքերով մեղադրանք էր առաջադրվել նաեւ Ժիրայր Սեֆիլյանին ու Գարեգին Չուգասզյանին:
«Շենգավիթ» բժշկական կենտրոնում կեսարյան հատումից երկու օր անց մահացած ծննդկանի հարազատները մահվան պատճառների վերաբերյալ ունեն տարբեր դիրքորոշումներ: 44-ամյա Նաիրա Աբգարյանի ամուսնու ընտանիքը հրաժարվել է բողոքից: Ավելին, մեզ հետ զրույցում ծննդկանի ամուսնու քույրը հայտարարեց, թե բողոքելով Նաիրային հետ չեն բերի: Այս հայտարարությունը բարկացրել է Նաիրայի քրոջը. քննությամբ պետք է պարզվի ամեն ինչ, պնդում է նա: Մահացած ծննդկանի քրոջ խոսքով՝ ինքը ոչ մեկին չի մեղադրում, միայն գիտի, որ քրոջն անհրաժեշտ արյուն հիվանդանոցը չի ունեցել, իրենց ստիպված այլ կենտրոններից են հայթայթել, իսկ դա մոտ 2 ժամ տեւել է:
Նշենք, որ դեպքի առթիվ քրեական գործ է հարուցվել:
Կոտայքի մարզում նախօրեին ուշ երեկոյան տեղի ունեցած խոշոր վթարից հետո հիվանդանոց տեղափոխված հղին ծննդաբերել է: Դեպքը տեղի է ունեցել Երեւան- Սեւան ավտոճանապարհին, միանգամից բախվել են 4 մեքենաներ: Վթարից հետո 4 ուղեւոր է տեղափոխվել հիվանդանոց, այդ թվում հղին, որն ավելի ուշ դուստր է ունեցել:
Արզականի գյուղապետը մեղադրվում է նախորդ տարի ուժեղ քամուց տուժած գյուղացիների վնասներն ուռճացրած ներկայացնելու մեջ: Բացի այդ, ըստ նախաքննական մարմնի, Նորիկ Մովսեսյանը տեղակալին հանձնարարել է բնակիչներից հավաքագրել որպես փոխհատուցում ստացած գումարները ցուցակում չընդգրկվածներին փոխանցելու պատրվակով: Գյուղապետն իրեն առաջադրված մեղադրանքն ընդունել է եւ պետությանը հասցված վնասը վերականգնել:
Ռիոյի Օլիմպիական խաղերի ծանրամարտի կանանց մրցաշարում հանդես եկավ Հայաստանի ներկայացուցիչ Նազիկ Ավդալյանը: 69 կգ քաշայինների պոկում վարժությունում Եվրոպայի այս տարվա չեմպիոնը ցույց տվեց 107 կգ արդյունք, իսկ հրում վարժությունում բարձրացրեց 135 կգ: Երկամարտի 242 կգ արդյունքով Նազիկ Ավդալյանը գրավեց 5-րդ տեղը:
«Ուրախ եմ, որ կարողացա օգտագործել իմ հնարավորությունները: Հիմա արդեն չեմ հիշում, թե ինչպես եմ գլխավերեւումս պահել 135 կիլոգրամը, որովհետեւ աչքերիս դիմացը սեւացել էր, ոտքերս չէի զգում: Չէի կարողանում ֆիքսել քաշը, բայց ստացվեց: Արեցի այն, ինչ կարող էի»,- մրցումից հետո NEWS.am Sport-ի թղթակցին ասել է Նազիկ Ավդալյանը:
Ծանրամարտի մրցաշարի 77 կգ քաշայինների պայքարում 2016թ. Եվրոպայի չեմպիոն Անդրանիկ Կարապետյանը երկրորդ վարժության երկրորդ փորձի ժամանակ արմունկի վնասվածք ստացավ եւ չկարողացավ ավարտել մրցումը՝ մնալով առանց տեղի:
Պոկում վարժությունում Անդրանիկ Կարապետյանը 174 կգ արդյունքով գրավել էր երկրորդ տեղը՝ զիջելով միայն 2012թ. Լոնդոնի օլիմպիական չեմպիոն, աշխարհի ռեկորդակիր, չինացի Լյու Սյաոյունին:
Հրում վարժությունում Անդրանիկ Կարապետյանը պայքարը սկսեց 195 կգ-ից: Առաջին մոտեցումը նրա մոտ չստացվեց: Երկրորդ փորձի ժամանակ 20-ամյա մարզիկը հետ գցեց ծանրաձողը եւ արմունկի ծանր վնասվածք ստացավ: 20-ամյա Կարապետյանն անմիջապես տեղափոխվել է հիվանդանոց:
Դոլարի փոխարժեքն այսօր անփոփոխ է մնացել, ռուբլունը աճել է, եվրոյինն ու ֆունտինը՝ նվազել։ Դոլարի փոխարժեքը կազմել է 476, ռուբլունը՝ 7․36, եվրոյինը՝ 530, ֆունտինը՝ 617 դրամ։
Երեւանում օգոստոսի 12-ին սպասվում է առանց տեղումների եղանակ: Առաջիկա գիշերը մայրաքաղաքում կդիտվի +23+25, իսկ վաղը ցերեկը՝ +38+40 աստիճան տաքություն: