Գյումրիում Ավետիսյանների ընտանիքի անդամների սպանության մեջ մեղադրվող՝ Գյումրիի ռուսական ռազմակայանի զինծառայող Վալերի Պերմյակովի համար դատախազն այսօր՝ օգոստոսի 12-ին, ցմահ ազատազրկում է պահանջել:
Հիշեցնենք, որ տուժողի իրավահաջորդների ներկայացուցիչներն այսօր՝ օգոստոսի 12-ին, լքել էին դատարանի դահլիճը: Փաստաբան Արամազդ Կիվիրյանը միջնորդել էր 2-3 շաբաթով հետաձգել դատական նիստը՝ պատճառաբանելով, որ իրենք բողոքարկել են քաղաքացիական հայցի վերաբերյալ Վերաքննիչ դատարանի կայացրած որոշումը: Դատավոր Հարություն Մովսեսյանը, մերժել էր միջնորդությունը՝ նշելով, որ նման հետաձգման հիմք չկա: Փաստաբանի խոսքով՝ պետք է սպասել Վճռաբեկ դատարանի կայացրած որոշմանը, քանի որ եթե բավարարվի բողոքը, քաղաքացիական հայցը ենթակա է քննման Շիրակի մարզի ընդհանուր իրավասության դատարանում:
Հիշեցնենք, որ ըստ մեղադրական եզրակացության համաձայն՝ 2015-ի հունվարի 12-ին Գյումրիի ռուսական ռազմակայանի զինծառայող Վալերի Պերմյակովը մտել է Ավետիսյանների ընտանիքի տուն ու սպանել տան բնակիչներ Աիդա Ավետիսյանին, Հասմիկ Ավետիսյանին, Սերյոժա Ավետիսյանին, Արմեն Ավետիսյանին, Արաքսյա Պողոսյանին ու փոքրիկ Հասմիկ Ավետիսյանին: Հետո նա դանակով հինգ հարված է հասցրել 6-ամսական Սերյոժա Ավետիսյանին: Յոթ օր անց երեխան մահացել էր հիվանդանոցում: