Հիվանդանոցում մահացել է պարեկա-պահակային գնդի տարածքում հուլիսի 17-ին տեղի ունեցած փոխհրաձգության հետեւանքով ծանր վիրավորված Գագիկ Մկրտչյանը: Ոստիկանության ենթասպան կրծքային-որովայնային հրազենային վիրավորում էր ստացել եւ 27 օր գտնվում էր անգիտակից վիճակում:

«Սասնա ծռեր» խմբի անդամ Սեդրակ Նազարյանի ինքնազգացողությունը նախօրեին դատարան, ապա՝ «Դատապարտյալների հիվանդանոց» տեղափոխելուց հետո ավելի է վատացել: Այս մասին ահազանգում են Նազարյանի փաստաբանները: Նրան շուրջ 8 ժամ պահել են դատարանի դահլիճում, սկզբում կանգնած, ապա պատգարակին պառկած: Նազարյանին թթվածին են միացրել, որից հետո նա դատարանում քնել է:

«Սասնա ծռեր» խմբին սնունդ տարած Արթուր Սարգսյանի ընկերները այսօր «Վերնիսաժում» կազմակերպել են նրա ձեռքի աշխատանքների վաճառք: Վաղ առավոտից քաղաքացիներ էին գալիս՝ հատուկ «Հաց բերողի» գործերը գնելու նպատակով: Վաճառքից ստացված ողջ գումարը փոխանցվելու է նրա հաշվեհամարին, որպեսզի հետագայում, երբ Արթուրը ազատության մեջ լինի, տնօրինի այն իր հայեցողությամբ։

Արարատի մարզում 1 շաբաթ առաջ անհետ կորած տարեց տղամարդը, պարզվում է, հատել է սահմանն ու հայտնվել Նախիջեւանում: Թե ինչ հանգամանքներում է նա այնտեղ հայտնվել, հայտնի չէ: Կարմիր խաչը կատարվածի վերաբերյալ դեռեւս պաշտոնական որեւէ հրապարակում չի արել: Հայտնի է միայն, որ սահմանը հատածը 61-ամյա Հենրիկ Աղեկյանն է, որն ունի հոգեկան խնդիրներ:

Երեւանում նախօրեին երեկոյան արտակարգ դեպք է տեղի ունեցել. 36-ամյա երիտասարդը շենքի 9-րդ հարկից ընկել է բակում կայանած մեքենաներից մեկի վրա եւ ողջ մնացել: Կարեն Միքայելյանը տեղափոխվել է հիվանդանոց, նրա կյանքին վտանգ չի սպառնում: Իրավապահ մարմիններն պարզում են կատարվածի հանգամանքները։

Ոստիկանությունը Մոսկվայից Երեւան է տեղափոխել 4 ամսական մի երեխայի, որից հայաստանցի մայրը հրաժարվել է: Ինչու է կինը հրաժարվել երեխայից, հայտնի չէ: Իրավապահ մարմինները գիտեն միայն, որ տղան առողջական խնդիրներ է ունեցել, Մոսկվայում վիրահատվել է: Այժմ փոքրիկը գտնվում է Նորքի մանկատանը:

Խանութից թան գնել չի կարելի՝ խորհուրդ  է տալիս  «Հայաստանի սպառողների ազգային ասոցիացիա» հասարակական կազմակերպության անդամ Միլետա Արիստակեսյանը։ Ըստ նրա, եթե թանի օգտագործման ժամկետը 10 օր է, նշանակում է` թանին կոնսերվանտներ են ավելացվել, իսկ դա շատ վտանգավոր է առողջության համար։

Հանրապետության տարածքում օգոստոսի 14-ին սպասվում է առանց տեղումների եղանակ: Առաջիկա երեք օրերին մայրաքաղաքում ցերեկը ջերմաստիճանը կհասնի 40–ի, ամսի 16-ից կսկսի նվազել 2-3 աստիճանով:

Դոլարի եւ ռուբլու փոխարժեքը նվազել է, եվրոյինը աճել։ Ամենրիկյա դոլարի փոխարժեքը օգոստոսի 13–ին կազմել է 474, ռուբլունը՝  7,29, եվրոյինը՝  531, իսկ ֆունտինը՝  617 դրամ։