ՄԱԿ փորձագետների խումբը Թուրքիային կոչ է անում երկրում հայտարարված արտակարգ իրավիճակի պայմաններում հետեւել այն պարտավորություններին, որ ստանձնել է Մարդու իրավունքների միջազգային օրենսդրության շրջանակում: Այս մասին նշված է ՄԱԿ մարդու իրավունքների գերագույն հանձնակատարի գրասենյակի տարածած հայտարարության մեջ:
Թուրքիայի նախագահ Ռեջեփ Թայիփ Էրդողանը հուլիսի 15-ին ռազմական հեղաշրջման փորձից հետո երկրում երեք ամսով արտակարգ իրավիճակ է մտցրել: Էրդողանը նաեւ հղում է կատարել Քաղաքացիական եւ քաղաքական իրավունքների միջազգային դաշնագրի 4-րդ հոդվածին, որը նախատեսում է որոշակի պայմաններում մարդու իրավունքների պահպանման երկրի պարտավորությունների ժամանակավոր չեղարկում: Թուրքիան այն վավերացրել է 2003 թվականին:
«4-րդ հոդվածին հղումն օրինական է միայն ազգի կյանքին սպառնացող վտանգի դեպքում. Պայման, որը, հնարավոր է, այս դեպքում չի կատարվում: Նույնիսկ այն իրավիճակներում, որոնք մոտ են այս պայմանին, 4-րդ հոդվածը սահմաններ է հաստատում, թե պետությունը որքանով է կարող շեղվել իր պարտավորություններից»,- նշված է հայտարարության մեջ:
Փորձագետներն ընդգծում են, որ նույնիսկ արտակարգ իրավիճակի ժամանակաշրջանում պետությունը պետք է կատարի կյանքի իրավունքի պաշտպանության իր պարտավորությունները, արգելի կտտանքները, հետեւի մարդու հիմնարար իրավունքներին, հրաժարվի խտրականությունից եւ պաշտպանի մարդկանց հավատի եւ սեփական կարծիքի արտահայտման իրավունքները:
ՄԱԿ ներկայացուցիչները նշում են, որ չնայած հասկանում են Թուրքիայի ճգնաժամ ապրելու հանգամանքը, սակայն «մտահոգված են, որ մարդու իրավունքների պաշտպանության երաշխիքների լայն շրջանակի սահմանափակման կառավարության նախաձեռնած քայլերը գերազանցում են այն մակարդակները, որոնք կարող էին այդ լույսի ներքո արդարացվել»:
