Ավետիսյանների սպանության համար ցմահ ազատազրկման դատապարտված Վալերի Պերմյակովն ի սկզբանե չի հանձնվել Հայաստանի Հանրապետությանը: Այս մասին, այսօր՝ օգոստոսի 24-ին, լրագրողների հետ հանդիպման ժամանակ նշել է Ավետիսյանների իրավահաջորդի ներկայացուցիչ-փաստաբան Լուսինե Սահակյանը:
Նրա խոսքով, բազմաթիվ բանակցություններից հետո ռուսական կողմն այդ գործը հանձնեց ՀՀ իրավապահ մարմիններին, եւ Հայաստանը հնարավորություն ստացավ, որ Պերմյակովին ՀՀ դատարանը դատի, բայց նա հանձնված չի Հայաստանին: «Իրավական առումով էլ միամտություն կլինի կարծել, որ դատավճռից հետո Պերմյակովին կհանձնեն Հայաստանին, որպեսզի նա պատիժը կրի Հայաստանում»,-ասաց փաստաբանն ու հավելեց. «Այդ հարցը կարգավորվում է երկու երկրների համաձայնություններով: Շատ դեպքեր կան, որ անձը, որը դատապարտվել է այլ երկրում, դիմի, որպեսզի պատիժը կրի իր երկրում, որի քաղաքացին հանդիսանում է: Պերմյակովի դեպքում՝ մի քիչ այլ է, նա ի սկզբանե հանձնված չէ Հայաստանին»:
Նույն խնդրի առնչությամբ Ավետիսյանների իրավահաջորդի ներկայացուցիչ-փաստաբան Արթուր Սաքունցն ասաց. «Մենք միջնորդություն էինք ներկայացրել, որ Պերմյակովի նկատմամբ հայկական դատարանը խափանման միջոց կիրառի, բայց այդպես էլ չկիրառվեց: Պերմյակովը կարող է ազատ տեղափոխվել Ռուսաստան եւ այստեղ Հայաստանի որեւէ իրավական մարմին այլեւս անելիք չունի: Թեեւ եթե մի փոքր թասիբ ունենան, կարող են կիրառել իրավական սանկցաները, դրա իրավունքը ունեն»:
Սաքունցը նշեց, որ Պերմյակովի դեպքում ճիշտ չէ օգտագործել «հանձնել» բառը, քանի որ նա երբեք էլ հայկական կողմին չի հանձնվել, որ հիմա էլ խոսք գնա հետ հանձնելու մասին: «Այստեղ տեղին է օգտագործել «տեղափոխել» բառը, կարող է նույնիսկ հայկական կողմին չտեղեկացնեն էլ այդ մասին»,-ասաց նա:
Հիշեցնենք, որ օգոստոսի 23-ին Գյումրիի ՌԴ 102-րդ ռազմաբազայի N զորամասում Շիրակի մարզի ընդհանուր իրավասության դատարանը հրապարակել է 2015թ. հունվարի 12-ին Գյումրիում Ավետիսյան ընտանիքի 7 անդամների սպանության մեջ մեղադրվող Վալերի Պերմյակովի դատավճիռը, վերջինս դատապարտվել է ցմահ ազատազրկման:
