Դանիայում շատ են հարգում Հենրիխ Մխիթարյանին եւ հետեւում են Յուրա Մովսիսյանին, ով շատ «ցավացրեց» Դանիային 0-4 հաշվով ավարտված խաղի ժամանակ: Այդ մասին NEWS.am-ի թղթակից Վերա Մարտիրոսյանի հետ զրույցում պատմեց դանիական առաջատար մարզական լրագրող եւ մեկնաբան Անդրեաս Կրաուլը:
Եվրո 2016 ընտրական փուլի վերջին հանդիպումից հետո՝ Հայաստան – Ալբանիա, դանիական ողջ հասարակությունը մեկ շաբաթ շատ վրդովված էր. կասկածներ կային, որ խաղը «ծախել են»: Մեզ անընդհատ զանգում էին դանիական լրատվամիջոցներից: Հիմա էլ խոսակցություններ կան, թե ԱԱ 2018 ընտրական փուլի առաջին խաղից առաջ (Դանիա – Հայաստան) այդտեղ մի քիչ նեղացած են հայկական թիմից: Որքանո՞վ են այդ խոսակցությունները համապատասխանում իրականությանը:
Այստեղ ավելի շատ տրամադրված էին Ալբանիայի դեմ. չարագործը նրանք էին, Հայաստանի մասին չի խոսվում: Հայաստանի հանդեպ վատ տրամադրված չեն: Մենք շատ հիասթափված էինք մեր երեւանյան խաղով՝ 0-0, բայց այդտեղ ավելի շատ մեղավոր էին դանիացի ֆուտբոլիստները:
Հայաստանի հետ վերջին խաղից հետո Դանիայի հավաքականում շատ բան է փոխվել. հեռացավ գլխավոր մարզիչ Մորտեն Օլսենը եւ ավագ Դանիել Ագերը: Ի՞նչ այլ կարեւոր բաներ են փոխվել թիմում:
Հիմնական փոփոխությունը 4-2-3-1 խաղային դասավորությունից 3-5-2-ի անցնել էր: Հիմա թիմը խաղալու է երեք կենտրոնական պաշտպաններով ու երկու եզրային կիսապաշտպաններով: Դանիայում կենտրոնական լավ պաշտպաններ բավականին շատ ունենք: «Կոպենհագենի» ավագ Թոմաս Դիլեինին նոր մարզչի կողմից համարվում է թիմում գլխավոր ֆուտբոլիստներից մեկը: Նա վերջերս տեղափոխվեց գերմանական «Վերդեր»:
Ի՞նչ գիտեք Հայաստանի ներկայիս հավաքականի մասին:
Շատ բան չգիտենք: Իհարկե, մենք հետեւում ենք Հենրիխ Մխիթարյանին, ում Դանիայում շատ ենք հարգում: Եվ, իհարկե, Յուրա Մոսիսյանին, ով շատ «ցավացրեց» Դանիային՝ 0:4 հաշվով ավարտված խաղի ժամանակ:
Ո՞վ է այս խմբի ֆավորիտը:
Հիմնական ֆավորիտը Լեհաստանն է: Նրանք շատ լավ հանդես եկան Եվրո 2016-ին եւ ունեն մի շարք ֆուտբոլիստներ, որոնք հանդես են գալիս Եվրոպական առաջատար ակումբներում:
Ինչպիսի՞ն են Դանիայի հնարավորությունները:
Դանիան շատ երիտասարդ, նոր թիմ է՝ լիքը տաղանդներով: Եթե մրցավազքը լավ սկսենք, կարող ենք բավականին վտանգավոր լինել, բայց շատ բարդ խումբ է՝ բավականին դժվար խաղերով:
ԱԱ 2018 ընտրական խմբի Դանիա - Հայաստան հանդիպումը տեղի կունենա սեպտեմբերի 4-ին Կոպենհագենի «Պարկեն» մարզադաշտում: E խմբում Հայաստանի ու Դանիայի հավաքականներից բացի ընդգրկված են Լեհաստանի, Ռումինիայի, Մոնտենեգրոյի ու Ղազախստանի հավաքականները:
Վերա Մարտիրոսյան