Վալերի Պերմյակովի փաստաբան Էդուարդ Աղաջանյանը վերաքննիչ բողոք է ներկայացրել առաջին ատյանի դատարանի որոշման կապակցությամբ:
Էդուարդ Աղաջանյանը NEWS.am-ի թղթակցի հետ զրույցում հայտնել է, որ վերաքննիչ բողոքը ներկայացվել է սեպտեմբերի 7-ին: «Չեմ կարող բացահայտել բողոքի բովանդակությունը, կասեմ ընդամենը, որ այն վերաբերում է սահմանն անցնելու անօրինական փորձին», - նշել է փաստաբանը:
Հիշեցնենք, որ իր պաշտպանական խոսքում փաստաբանն արձանագրել է, որ ամբաստանյալն իրեն մեղավոր է ճանաչել սպանության համար եւ դատաքննության ընթացքում չի հերքել իրեն հասցեագրված մեղադրանքը: Հաշվի առնելով, որ փաստաբանը չի կարող հակառակվել պաշտպանյալի կամքին, Էդուարդ Աղաջանյանն իր խոսքում շրջանցել է մեղադրանքի այդ մասը: Սակայն պաշտպան ըպահանջել է մեղադրյալնին անմեղ ճանաչել սահմանն ապօրինի հատելու փորձի կապակցությամբ։
Օգոստոսի 23-ին Շիրակի մարզի իրավասության դատարանը Վալերի Պերմյակովին մեղավոր է ճանաչել մեղադրանքի բոլոր կետերով` Ավետիսյանների ընտանիքի յոթ անդամների սպանություն (104 հոդվածի 5-րդ եւ 8-րդ մասեր), ավազակային հարձակում (175-րդ հոդվածի 3-րդ եւ 4-րդ մասեր), սահմանն անօրինականորեն հատելու փորձ (34-329-րդ հոդվածի 1-ին մաս): Դատարանի վճռով, Վալերի Պերմյակովը դատապարտվել է ցմահ ազատազրկման:
Ողբերգությունը տեղի է ունեցել 2015 թվականի հունվարի 12-ին: Մեղադրական եզրակացության համաձայն՝ ռուսական բազայի զինծառայող Վալերի Պերմյակովը ներթափանցել է Ավետիսյանների տուն եւ գնդակահարել տան բնակիչներ Աիդա Ավետիսյանին, Հասմիկ Ավետիսյանին, Սերյոժա Ավետիսյանին, Արմեն Ավետիսյանին, Արաքսյա Պողոսյանին եւ կրտսեր Հասմիկ Ավետիսյանին: Հետո հինգ հարված է հասցրել փոքրիկ Սերյոժա Ավետիսյանին: Երեխան յոթ օր անց մահացել է հիվանդանոցում: Վալերի Պերմյակովն իր գործողությունները բացատրում է նրանով, որ ուզում էր տուն հասնել: Պերմյակովն ինքնակամ թողել է դիրքը` վերցնելով ինքնաձիգը: Գիշերային Գյումրիով թափառելիս` նա խմելու ցանկություն է ունեցել եւ, պատուհանը կոտրելով, մտել է Ավետիսյանների տուն ջուր խմելու: Աղմուկից արթնանալով` Աիդա Ավետիսյանը բղավել է: Վալերի Պերմյակովի պնդմամբ, ինքը վախեցել է եւ սկսել է կրակել: Միաժամանակ հարեւաններից ոչ մեկը կրակոցի ձայներ չի լսել: Ընտանիքին գնդակահարելով` Վալերի Պերմյակովը հագել է տանն իր գտած հագուստը եւ փախել է` տնից վերցնելով մի քիչ փող եւ սպանվածների բջջային հեռախոսները: Միաժամանակ նա Ավետիսյանների տանն է թողել սեփական համազգեստը` տիրոջ անունով եւ ազգանունով, ինչպես նաեւ ինքնաձիգը: Ռուսաստանցի սահմանապահները Վալերի Պերմյակովին հայտնաբերել են «Բայանդուր» անցակետի տարածքում:
2015 թվականի օգոստոսի 12-ին Գյումրիի թիվ 5 զորամասային դատարանի արտագնա նիստին Վալերի Պերմյակովը դասալքության համար դատապարտվել է տասը տարվա ազատազրկման խիստ ռեժիմի ուղղիչ հաստատությունում:
