Դատախազությունը պետք է պարզաբանի, թե ինչ է նշանակում 2008-ի մարտի 1-ին ցուցարարների դեմ մահաբեր ուժի կիրառման բացառիկ անհրաժեշտությունը: Սեպտեմբերի 14-ին ԱԺ-ում այս մասին հայտարարել է ՀԱԿ խմբակցության քարտուղար Արամ Մանուկյանը՝ ելույթ ունենալով գլխավոր դատախազի պաշտոնում առաջադրված Արթուր Դավթյանի թեկնածության քննարկմանը:
ՄԻԵԴ հարցմանը գլխավոր դատախազության պատասխանում նշված է, որ 2008-ի մարտի 1-ին ցուցարարների դեմ մահաբեր ուժի կիրառումը բացառիկ անհրաժեշտություն էր: «Եթե այդպես է, ապա ո՞վ է կրակել, ո՞րն էր սպանության դրդապատճառը, եւ ինչո՞ւ եք դուք որոշել, որ մահաբեր ուժի անհրաժեշտություն կար: Դատախազությունն ինչպե՞ս է նման եզրակացության եկել՝ այդ ամենը չիմանալով: Հետեւաբար՝ նրանք կա՛մ խաբել են, կա՛մ կազմակերպիչներին եւ կատարողներին չպատժելու հիմքեր ունեն: Այդ պատճառով մենք չենք հավատում, որ Ձեզ՝ պարոն Դավթյան, կհաջողվի ինչ-որ բան փոխել: Քանի որ նրանք, ովքեր Ձեզ քաղաքական հանձնարարություններ են տալիս, թաթախված են հանցավորության մեջ: Ոչ թե առանձին անձինք, այլ ամբողջ համակարգը»,- ասել է Մանուկյանը:
Հիշեցնենք, որ իշխանություններ-ընդդիմություն հակամարտության ժամանակ 2008-ի մարտի 1-ին Երեւանի կենտրոնում զոհվել են 8 ցուցարարներ եւ Ներքին զորքերի 2 ծառայողներ:
