Այսօր` հոկտեմբերի 15-ի Հայ ազգային կոնգրեսի հանրահավաքին հաջորդող երթը թեեւ, ընդհանուր առմամբ, խաղաղ է անցել, սակայն, ընթացքում մի քանի անգամ լարվածություն է ստեղծվել ՀԱԿ-ի ակտիվիստների եւ Երեւանի փոխոստիկանապետ Ռոբերտ Մելքոնյանի միջեւ:
Ինչպես երթից հաղորդում է NEWS.am-ի թղթակիցը, Ռ. Մելքոնյանը հարձակվել է երթի առջեւից գնացողների վրա եւ լարվածություն ստեղծել: Բանը հասել է նաեւ թեթեւ քաշքշոցի, որի ժամանակ քաշքշել են ՀԱԿ-ի արտաքին հարաբերությունների հանձնաժողովի անդամ Վլադիմիր Կարապետյանին: Լրագրողների հարցին, թե ինչո՞ւ է լարվածություն ստեղծում, Երեւանի փոխոստիկանապետը նետել է. «Լկտի լակոտներ են» ու հեռացել է:
Վլադիմիր Կարապետյանն էլ նշել է, որ իրենք ոչ մի անօրինական արարք թույլ չէին տալիս եւ իր համար անհասկանալի են Երեւանի փոխոստիկանապետի նման վարքի պատճառները:
Հիշեցնենք, որ այս անգամ երթը ավելի կարճ է եղել, պայմանավորված, թերեւս, եղանակային պայմաններով:
