Ամերիկացի գրող Ջորջ Մարտինը պատմել է «Գահերի խաղ» սերիալի համար հնարավոր նախապատմություն գրելու մասին, հայտնում է The Independent-ը:
«Ես իրոք հազարավոր էջերով հորինովի նյութ ունեմ այն պատմության մասին, որը հանգեցրել է «Գահերի խաղին», – ասել է Մարտինը «Էմմի» մրցանակաբաշխության արարողությանը: «Այնպես որ, նյութ շատ կա, ես դեռ գրում եմ», – հավելել է նա:
Միաժամանակ գրողը նշել է, որ ներկայումս անհրաժեշտ է ավարտել հիմնական սերիալը, ինչպես նաեւ «Սառույցի եւ կրակի երգ» շարքի մնացած գրքերը, այնպես որ, «այդ ամենը շահարկումներ են»:
2016 թվականի ապրիլին Մարտինը հայտնել էր, որ թափառական ասպետի եւ նրա զինակրի դեգերումները կարող են «Գահերի խաղ» սերիալի համար նախապատմության սյուժե դառնալ. գրողը շեղվել է իր ֆանտաստիկ սագայի վեցերորդ հատորի ավարտից եւ պատմել է նախագծի հնարավոր զարգացման մասին:
