Պրոֆեսոր Մարկ Մուղալյանը Պատվո լեգեոնի շքանշան է ստացել 2015 թվականին Ամստերդամից Փարիզ ընթացող արագընթաց գնացքում ահաբեկչական հարձակման կանխմանն օգնելու համար: Այդ ժամանակ նա եւ մի ֆրանսիացի, արձակուրդում գտնվող ամերիկացի երկու զինծառայողներ ու մի բրիտանացի կարողացել էին վնասազերծել դանակով եւ հրազոնով զինված մարոկկացուն: Այս մասին հայտնում է L'express-ը:
Ելիսեյան պալատում Պատվո լեգեոնի շքանշանը հանձնել է Ֆրանսիայի նախագահ Ֆրանսուա Օլանդը: Պարգեւը ֆրանսիացուն է հանձնվել, որը նաեւ ԱՄՆ քաղաքացիություն ունի, պատահարից ավելի քան մեկ տարի հետո:
2015-ի օգոստոսին Մուղալյանը ենթադրյալ ահաբեկչի հետ պայքարում վիրավորվել էր պարանոցին արձակված կրակոցից: Երբ անհայտ մնալ ցանկացող ֆրանսիացին փորձել է մտնել գնացքի զուգարան, բախվել է զինված մարոկկացուն եւ փորձել է նրան հաղթել ուժով: Նրանց պայքարը տեսնելով՝ Մուղալյանը փորձել է միջամտել, սակայն վիրավորվել է:
Հիշեցնենք, որ պատահարը տեղի է ունեցել 2015 թվականի օգոստոսի 21-ի երեկոյան Thalys գնացքի վագոնում: Արաբական ծագմամբ երիտասարդը կրակ է բացել ինքնաձիգից: Նրան արագորեն չեզոքացրել են ուղեւորնեը, որոնց թվում են եղել երկու ամերիկացի զինծառայողներ, որոնցից մեկը հրազենային վիրավորում է ստացել, երկրորդը՝ դանակի հարված: Ընդամենը երեք մարդ է տուժել: Գնացքում 554 ուղեւոր է եղել: