Ես շարունակում եմ պնդել, որ առանց ժողովրդի կամարտահայտման իշխանափոխություն հնարավոր չէ անել, որովհետեւ ժողովուրդն այն գործոնն է, որը որոշումներ է կայացնում: Այս մասին, այսօր՝ հոկտեմբերի 3-ին, լրագրողների հետ զրույցում նշել է «Քաղաքացիական պայմանագիր» կուսակցության վարչության անդամ, ՀԱԿ խմբակցության պատգամավոր Նիկոլ Փաշինյանը՝ անդրադառնալով փաստին, որ նախօրեին կայացած ՏԻՄ ընտրություններում ՔՊ-ն Վանաձորում եւ Գյումրիում չի հաղթահարել 6-տոկոսանոց նվազագույն շեմը:
Հարցին, թե երեկ տեղի ունեցած ընտրություններից հետո շարունակո՞ւմ են պնդել, որ ՀՀ-ում հնարավոր է ընտրությունների միջոցով իշխանափոխություն կատարել, Փաշինյանը պատասխանեց. «Համենայնդեպս, ես անհնար եմ համարում իշխանափոխություն՝ առանց ժողովրդի կամարտահայտման: Իշխանափոխությունն արվում է հանուն ժողովրդի, ոչ թե ի հեճուկս»:
Նիկոլ Փաշինյանը նախօրեի ընտրություններից հետո շարունակում է պնդել, որ «Քաղաքացիական պայմանագիրը» հավակնում է լինել Հայաստանի թիվ մեկ ընդդիմությունը. «Քանի դեռ Հայաստանում չի ձեւավորվել մեկ ինստիտուցիոնալ ընդդիմություն, երկրում չի լինելու ժողովրդավարական իշխանափոխություն: Մենք հավակնել էլ ենք, հավակնում էլ ենք լինել այդ միակ ընդդիմությունը, դաշինքային հարաբերությունները մեզ համար դժվար պատկերացնելի են, եւ եթե կան ուժեր, ովքեր պատրաստ են ուժերը մեկտեղել, նրանք պետք է համախմբվեն մեկ քաղաքական ուժի շուրջ»:
ՔՊ-ի անդամը կուսակցությունների 90 տոկոսի հետ որեւէ համագործակցության եզրեր չի տեսնում. «Ուղղակի քաղաքական կենսագրությունից ելնելով չեմ կարող համագործակցել: Գուցե կարող է պարզվի՝ իրենց գործունեությունը ընդունելի է ժողովրդի համար, բայց դա իմ գնահատականը չի փոխում»:
Նիկոլ Փաշինյանը զարմացած է նախօրին կայացած ՏԻՄ ընտրությունների արդյունքներով. «Ինձ ընդհանրապես զարմացրեց, որ Հայաստանի հանրապետական կուսակցությունն այս ընտրություններում Վանաձորում, Կապանում եւ այլ տեղերում հաղթանակ ունեցավ»:
Նշենք, որ «Քաղաքացիական պայմանագիրը» Վանաձորի եւ Գյումրիի ընտրություններում չի հաղթահարել 6-տոկոսանոց շեմը: ՔՊ-ն Վանաձորում ստացել է 4,08 տոկոս, իսկ Գյումրիում՝ 1,48 տոկոս: