Ընտրություններում իրենց անհաջողությունների համար որոշ քաղաքական ուժեր ավելի լավ կանեն առաջին հերթին մեղադրեն իրենց։ Այս մասին հոկտեմբերի 5-ին՝ Ազգային ժողովում ԿԸՀ նախագահի պաշտոնում Տիգրան Մուկուչյանի թեկնածության քննարկման ժամանակ, ասել է ՀՀԿ պատգամավոր, ԱԺ փոխխոսնակ Հերմինե Նաղդալյանը։
Նրա խոսքով՝ այդ թվում հոկտեմբերի 2-ին ՏԻՄ ընտրություններում անհաջողությունների պատճառն ավելի լավ է նրանք իրենց մեջ փնտրեն։ Ցավոք, շատերը հայտնի վատ պարողի նման, իրենցից բացի, բոլորին մեղադրում են։ «Սեփական անձի նկատմամբ օբյեկտիվ մոտեցման լավ օրինակ ցույց տվեց Նիկոլ Փաշինյանը։ Կարծում եմ, որ նման քննարկումներ պետք է անցկացնեն նաեւ մյուս ուժերը»,– ասել է Նաղդալյանը։
«Պետք է հասկանալ, որ ԿԸՀ նախագահը պատասխանատու չէ ընտրություններում ինչ–որ մեկի հաջողությունների կամ անհաջողությունների համար։ Աշխատե՛ք ընտրողների հետ, փորձե՛ք ստանալ նրանց ձայները։ Եվ մի՛ մեղադրեք ՀՀԿ–ին եւ ԿԸՀ–ին, որ ինչ–որ մեկը ձեր օգտին չի քվեարկել»,– ասել է նա։