Բոլոր թուրքերը կարող են դիմել Մարդու իրավունքների եվրոպական դատարան, եթե կարծում են՝ իրենց հետ իշխանությունները սխալ են վարվել: Այս մասին այսօր՝ հոկտեմբերի 10-ին, Եվրոպայի խորհրդի խորհրդարանական վեհաժողովում հայտարարեց Եվրոպայի խորհրդի գլխավոր քարտուղար Թյորբորն Յագլանդը՝ պատասխանելով հարցին, թե ինչ է արվում Թուրքիայում ճնշումների ենթարկվող լրագրողներին օգնելու համար, հաղորդում է NEWS.am-ի թղթակիցը:
«Թուրքիայում հեղաշրջման փորձի տապալումից հետո մենք լայնածավալ աշխատանք են սկսել իրականացնել Թուրքիայի իշխանությունների հետ՝ նաեւ մարդու իրավունքների պաշտպանության առումով: Ինչպես գիտեք, Թուրքիայի դեմ բազմաթիվ գործեր կան ՄԻԵԴ-ում, պետք է սպասել, թե ինչ վճիռ կկայացվի»,- ասաց Յագլանդը՝ նշելով, որ կարեւոր է, որ մարդիկ կարող են դիմել ՄԻԵԴ, եթե Թուրքիայի իշխանությունների գործողությունները սխալ են համարում:
Հիշեցնենք, որ հուլիսի 16-ին Թուրքիայում տեղի է ունեցել պետական հեղաշրջման փորձ: Այն նախաձեռնել էին երկրի զինվորականները: Տապալումից հետո Էրդողանը սկսել է հազարավոր զինվորականների, սովորական քաղաքացիների եւ ԶԼՄ ներկայացուցիչների ձերբակալել, ճնշումների եւ բռնությունների ենթարկել:
Աիդա Հովհաննիսյան, Ստրասբուրգ