ԲՀԿ խմբակցության պատգամավոր Միքայել Մելքումյանը ԵԽԽՎ լիագումար նիստում Պանամական օֆշորային սկանդալի վերաբերյալ ելույթ է ունեցել՝ մատնանշելով Ալիեւի դուստրերի ոսկու հանքերի մասին։
«Ներկայումս ամբողջ աշխարհում լրջագույն խնդիր է անկատար հարկային քաղաքականությունը եւ դրանից բխող եկամուտները թաքցնելու խնդիրը, այսինքն՝ անօրինական եկամուտներ ստանալու փորձը, ստվերային տնտեսությունը, իսկ դա նշանակում է նաեւ՝ անօրինական ծախսերը: Սա հանգեցնում է մեկ ակնհայտ երեւույթի՝ անարդարության եւ անհավասար մրցակցային պայմանների ձեւավորման:
Իհարկե, սա նոր երեւույթ չէ, սակայն ներկայումս տեղեկատվական ցանցերով եւ արտասահմանյան ժամանակակից ձեւերով այն հասել է իր ծավալներով նոր, ահագնացող մակարդակի։ Այդ երեւույթները հանդես են գալիս տարբեր ձեւերով եւ նախեւառաջ, այսպես կոչված՝ օֆշորների տեսքով»,–հայտարարել է Միքայել Մելքումյանը:
Պատգամավորը նշել է, որ նշված խնդիրների լուծումը պետք է կայանա միջազգային հանրության եւ պետությունների համատեղ եւ արդյունավետ ջանքերով։
«Ինչպես կարող է այն կայանալ, եթե որոշ երկրներում (օրինակ՝ Ադրբեջանում) դրան նպաստում են հենց երկրների ղեկավարները եւ հետո այն քողարկելու համար սանձազերծում պատերազմ, ինչպես այն տեղի ունեցավ ղարաբաղա-ադրբեջանական հակամարտության շփման գծի ամբողջ երկայնքով ս.թ. ապրիլի 2-5-ը.... Սակայն ռիսկեր, կապված օֆշորների, կապիտալի անօրինական արտահանման եւ ապա, այսպես կոչված, ռեէքսպորտի հետ, իհարկե, միշտ էլ կան:
Այս առումով անհրաժեշտ են ամենախիստ պատժամիջոցները թե՛ քրեական օրենսգրքերի եւ թե՛ վարչական, հարկային օրենսդրության շրջանականերում։ Դրա հիմքում պետք է լինի ժամանակին եւ անհրաժեշտ ծավալով տեղեկատվության ամբողջ ծավալով տրամադրումը տարբեր պետությունների կողմից: Դրա մասին կան միջպետական պարտավորություններ: Ուղղակի դրանք պետք է հետեւողականորեն կատարել:
Կարեւոր նշանակություն է ձեռք բերում նաեւ Կենտրոնական բանկի եւ այլ կառույցներում գործող ֆինանսական մոնետարների գործունեությունը եւ դրանց կանխարգելիչ գործունեությունը, Մանիվալի, Գրեկոյի եւ կոռուպցիայի դեմ պայքարի ինստիտուտների արդյունավետ գործունեությունը: Երեք հիմնական կարեւոր ուղղություններ են՝ կոռուպցիա, մենաշնորհների դեմ պայքար եւ դատական արդարացի համակարգ, մարդու իրավունքներ:
Սակայն այս ամենը չպետք է խոչընդոտի նաեւ լեգալ կապիտալի ազատ տեղաշարժին, այլապես մենք կնվազեցնենք երկրների ներդրումային գրավչությունը:
Անդրադառնալով Պանամական փաստաթղթերին, նշեմ, որ Ադրբեջանի նախագահի ընտանիքի անդամների համար առանձին գլուխ է հատկացված, որտեղ ներկայացվում են նրանց կապերը օֆշորային կազմակերպությունների բարդ համակարգի հետ: Այս փաստաթղթերը ցույց են տալիս, որ 2003 թվականին Ադրբեջանի հարկերի նախարար Ֆազիլ Մամեդովը ստեղծում է AtaHolding կոնգլոմերատը Ալիեւների ընտանիքի անդամների մասնակցությամբ, որի հետաքրքրությունների շրջանակը սկսվում է բանկային, հեռուստակոմունիկացիոն ոլորտերից մինչեւ բնական ռեսուրսներով հարուստ երկրի շինարարական, հանքարդյունաբերական եւ նավթագազային ոլորտներ:
Պանամայում Մամեդովը հիմնադրել է երկու կառույց՝ «FM Management Holding Group»-ը եւ «UF Universe Foundation»-ը, վերջինը հանդիսանում է նախորդի կառավարողը, իսկ կառավարիչներից մեկը Մեհրիբան Ալիեւան է: Համաձայն «Պանամական փաստաթղթերի» եւ «Կոռուպցիայի եւ կազմակերպված հանցավորության հետաքննության նախագծի» (OCCRP)՝ 2006 թվականին նախագահ Ալիեւը վեց ոսկու հանքերի օգտագործման իրավունքը փոխանցել է ադրբեջանական մի քանի կազմակերպությունների, այդ թվում՝ երկու օֆշորային կազմակերպության, որոնք իրականում պատկանում են Ալիեւի երկու աղջիկներին: Քույրերին է պատկանում նաեւ բրիտանական Globex International LLP-ի բաժնետոմսերի 56%-ը եւ պանամական Londex Resourses S.A.-ն: Վեց ոսկու հանքերի բաժնետոմսերի համապատասխանաբար 11%-ը եւ 45%-ը տնօրինում են այս երկու կազմակերպությունները»,–հայտարրել է Մելքումյանը: