Ղազախստանի նախագահ Նուրսուլթան Նազարբաեւի ժամանումը Երեւան նրան կդներ ոչ այդքան հաճելի դրության մեջ։ Նման տեսակետ է հայտնել ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը՝ NEWS.am -ի թղթակցի խնդրանքով մեկնաբանելով այն տեղեկությունը, որ Նազարբաեւը հրաժարվել է մասնակցել Երեւանում ՀԱՊԿ Հավաքական անվտանգության խորհրդի նստաշրջանին՝ պատճառաբանելով որ վատառողջ է, մրսած է։ Հիշեցնենք, որ նստաշրջանում Ղազախստանը ներկայացնելու է երկրի վարչապետը։
Ալեքսանդր Մարկարովը հիշեցրեց, որ որոշ հարցերի շուրջ Ղազախստանի դիրքորոշումը հակասում է կազմակերպության անդամ երկրների միատեսակ մոտեցման մասին ՀԱՊԿ դիրքորոշմանը, եւ Ղազախստանը գիտի այդ մասին։ Մյուս կողմից էլ Նազարբաեւը ձգտում է միջնորդ դառնալ տարածաշրջանային խնդիրների կարգավորման գործում։ «Այլ հարց է՝ թե որքանով է դա ընդունելի կամ անընդունելի», նկատեց քաղաքագետը։ «Հաշվի առնելով այս փաստերը՝ Նուրսուլթան Նազարբաեւի ժամանումը Երեւան կարող էր նրան ոչ այդքան հաճելի դրության մեջ դնել»,- շարունակեց Ալեքսանդր Մարկարովը։
«Սակայն դժվար է ասել՝ տվյալ դեպքում խոսքը բժշկական, թե քաղաքական հիվանդության մասին է։ Արեւելյան երկրներում նախագահին հիվանդ հայտարարելը ոչ թե բժշկական, այլ քաղաքական խնդիր է»,- շեշտեց Ալեքսանդր Մարկարովը։