Եվրոպայի խորհրդի Խորհրդարանական վերհաժողովը (ԵԽԽՎ) Ուկրաինայի հարցով երկու բանաձեւ է ընդունել: ՈՒՆԻԱՆ-ի հաղորդմամբ՝ բանաձեւերն ընդունվել են ձայների մեծամասնությամբ:
Խոսքը, մասնավորապես, վերաբերում է «Ուկրաինայի վերահսկողությունից դուրս գտնվող ուկրաինական տարածքներում մարդու իրավունքների խախտման դեպքում իրավական պաշտպանության միջոցներին», որը պատրաստել է զեկուցող Մարիլուիզա Բեքը, եւ «Ուկրաինայում ռուսական ագրեսիայի քաղաքական հետեւանքներին» (նախապես կոչվում էր «Ուկրաինայում ճգնաժամի քաղաքական հետեւանքները), որի զեկույցով ելույթ է ունեցել Չեխիայի պատգամավոր Քրիստինա Զելենկովան:
«Ուկրաինայում ռուսական ագրեսիայի քաղաքական հետեւանքները» բանաձեւում ԵԽԽՎ-ն կրկին դատապարտել է «Ռուսաստանի կողմից Ղրիմի բռնազավթումը եւ Մոսկվային կոչ է արել Ուկրաինայից դուրս բերել զորքերը»:
«Ուկրաինայի վերահսկողությունից դուրս գտնվող ուկրաինական տարածքներում մարդու իրավունքների խախտման դեպքում իրավական պաշտպանության միջոցներ» կոչվող փաստաթղթում ԵԽԽՎ-ն խորը մտահոգություն է հայտնել Ղրիմում եւ Դոնբասում մարդու իրավունքների ասպարեզում վիճակի համար եւ Ռուսաստանի իշխանություններին կոչ է արել երաշխավորել այդ տարածքների բոլոր բնակիչների հիմնարար իրավունքներն ու ազատությունները: