Եվրոպայի խորհրդի խորհրդարանական վեհաժողովում տեղի է ունեցել ՀՀ ԱԺ փոխնախագահ, ԵԽԽՎ փոխնախագահ, ԵԽԽՎ-ում հայկական պատվիրակության ղեկավար Հերմինե Նաղդալյանի եւ ԵԽԽՎ նախագահ Պեդրո Ագրամունտի հանդիպումը:
Հանդիպման ժամանակ քննարկվել են Վեհաժողովի աշխատանքներին առնչվող ընթացիկ հարցեր, քաղաքական գործընթացների հնարավոր զարգացումները, համագործակցության եզրերը, ԵԽԽՎ-ում շրջանառվող նախաձեռնությունների ընթացքը: Պեդրո Ագրամունտը ցանկություն է հայտնել այցելելու Հայաստան: Նա նաեւ տեղեկացրել է, որ պատրաստվում է հայկական եւ ադրբեջանական պատվիրակությունների միջեւ շփումներ կազմակերպելու նախաձեռնությամբ հանդես գալ եւ քննարկել ԵԽԽՎ աշխատանքն առավել կառուցողական հունով տանելու հնարավորությունները:
Հերմինե Նաղդալյանը զրույցի ընթացքում նշել է, որ վերջին շրջանում ԵԽԽՎ-ում կատարվող գործընթացները եւ նոր նախաձեռնությունները շատ կարեւոր են եւ իրենց ազդեցությունն են թողնում Վեհաժողովի գործընթացների վրա եւ այդ իմաստով էական են ԵԽԽՎ նախագահի նախաձեռնությունները: Տիկին Նաղդալյանը հավելել է, որ ամեն դեպքում հայկական կողմն ակնկալում է ԵԽԽՎ նախագահի առավել անկողմնակալ, հավասարակշռված եւ անաչառ մոտեցումները, ինչը կնպաստի առաջին հերթին Վեհաժողովի աշխատանքների արդյունավետությանը եւ մթնոլորտի բարելավմանը: Կողմերը համաձայնել են անդրադառնալ բարձրացված հարցերին գալիք տարվա հունվարյան նստաշրջանում:
.jpg)
