Ողբերգական պատահար Հյուսիսային Օսիայում: Առավոտյան ժամը 04.30-ի սահմաններում Հյուսիսային Օսիայում՝ Վլադիկավկազ-Բեսլան շրջանցիկ ճանապարհին, Մոսկվա-Երեւան երթուղու ավտոբուսը բախվել է «Սկանիա» բեռնատարին: Պատահարի հետեւանքով 5 մարդ է զոհվել, 27 վիրավոր կա: Տուժածներից 4-ը երեխաներ են: Ներկայում տարբեր հիվանդանոցներում 9 տուժած կա, այդ թվում՝ 4 երեխաները: Նրանցից երկուսը վերակենդանացման բաժանմունքում են, մեկի վիճակը բժիշկները ծանր են գնահատում:

Ռուսաստանում Հայաստանի դեսպանության տվյալներով՝ զոհերից երկուսը Հայաստանի, երեքը՝ Ռուսաստանի քաղաքացիներ են: Նրանք են՝ 1960 թվականին ծնված Լունոնյան Ա.Պ.-ն, 1954 թվականին ծնված Պողոսյան Յու.Ս.-ն, 1968 թվականին ծնված Լազուկին Ա.Վ.-ն, 1973 թվականին ծնված Պանչենկո Վ.Մ.-ն, 1999 թվականին ծնված Մամչենկո Ս.Ս.-ն:

Բեսլանի մշակույթի տանը ստեղծվել է ժամանակավոր տեղակայման կետ, ուր տեղափոխվել են այն ուղեւորները, որոնք բուժօգնության կարիք չունեն։ Նրանք ավելի ուշ ավտոբուսով ուղեւորվել են Երեւան: Բացի այդ, Ռուսաստանի նախագահ Վլադիմիր Պուտինը հանձնարարել է օդանավ տրամադրել՝ ավտոբուսի ուղեւորներին Երեւան տեղափոխելու համար: Այն արդեն Բեսլան է ուղեւորվել:

Հյուսիսային Օսիայի ներքին գործերի նախարարության տվյալներով՝ ուղեւորատար ավտոբուսի վարորդը կորցրել է կառավարումը, ինչի արդյունքում էլ բախվել է մայթեզրին կանգնած բեռնատարին: Այլ աղբյուրի համաձայն՝ վարորդը քնել է ղեկին: Հարուցվել է քրեական գործ՝ ճանապարհային երթեւության կանոնները խախտելու փաստով: Քննչական խումբ է ստեղծվել:

Ռուսական աղբյուրների հաղորդմամբ՝ վթարի ենթարկված փոխադրամիջոցն առանց Ռուսաստանի տրանսպորտի նախարարության թույլտվության է աշխատել: Բացի այդ, վարորդները տարբեր ժամանակներում վարչական պատասխանատվության են ենթարկվել՝ ամրագոտի չկապելու եւ արագությունը գերազանցելու համար:

Վթարի կապակցությամբ Հայաստանի նախագահ Սերժ Սարգսյանը ցավակցական ուղերձ է հղել, ինչպես նաեւ հանձնարարականներ տվել պատկան մարմիններին:

Հավելենք, որ վթարի հետեւանքով տուժածների մասին մանրամասն տեղեկություններ տրամադրելու համար Հյուսիսային Օսիայի առողջապահության նախարարությունում գործում է թեժ գիծ` 007-86-72-40-38-92 հեռախոսահամարով: