Հատուկ խնդիր չկար, որ ՀԱՊԿ երեւանյան գագաթաժողովում կառույցի գլխավոր քարտուղարի պաշտոնում Հայաստանի ներկայացուցչի նշանակումը տեղափոխվեց տարեվերջ: Այս մասին NEWS.am-ի հետ զրույցում ասաց ԱԺ արտաքին հարաբերությունների մշտական հանձնաժողովի ղեկավար Արտակ Զաքարյանը:
«Նման իրավիճակներ կարող են լինել, դա կոնսենսուսով լուծվող հարց է, կարծում եմ՝ տարեվերջին անպայման լուծում կստանա»,-ասել է Արտակ Զաքարյանը:
Նշենք, որ ՀԱՊԿ գլխավոր քարտուղար Նիկոլայ Բորդյուժան մեկ ամիս առաջ հայտարարել էր, որ հոկտեմբերի 14-ին Հայաստանում տեղի ունեցող նիստի ժամանակ նաեւ կընտրվի գլխավոր նոր քարտուղար, որը կլինի Հայաստանի ներկայացուցիչ:
Հարցին՝ հնարավո՞ր է ներկայացված թեկնածուին չի համաձայնել Ռուսաստանը, Արտակ Զաքարյանն արձագանքելն է. «Քանի որ շատ դետալներ հրապարակային չի քննարկվում, եւ դա հենց պետությունների ղեկավարների մակարդակով համաձայնեցվող հարց է, ես կարծում եմ՝ դա զուտ կարող է լինել որոշակի հանգամանքներով պայմանավորված հարց, որը լրացուցիչ քննարկումներ է պահանջում, հետեւաբար տեղափոխվել է տարեվերջյան նիստին»:
Նա անպատասխան թողեց հարցը, թե արդյոք հնարավո՞ր է, որ տարեվերջյան հանդիպմանը որոշվի, որ Հայաստանի ներկայացուցիչը չի զբաղեցնելու քարտուղարի պաշտոնը:
