Ալիեւի հայտարարությունը, մանավանդ ռուսական լրատվամիջոցներին, անտեղի է: Այս մասին, այսօր՝ հոկտեմբերի 18-ին, Ազգային ժողովում լրագրողների հետ զրույցում նշել է ԱԺ փոխնախագահ, ՀՀԿ խոսնակ Էդուարդ Շարմազանովն՝ անդրադառնաով Ադրբեջանի նախագահի հարցազրույցին, որտեղ վերջինս ասել է, որ Ղարաբաղին կարող է շնորհվել ինքնավար հանրապետության կարգավիճակ Ադրբեջանի կազմում:
«Ես այնպիսի կարծիք ստացա, որ պարոն Ալիեւը ենթագիտակցաբար սխալվել է մեկ բառի հարցում, հանրապետությունը ճիշտ է ասել, բայց միգուցե ցանկացել է ասել անկախ հանրապետություն, ասել է ինքնավար հանրապետություն: Իսկ եթե ավելի լուրջ՝ տեղեկացնեմ, որ Ալիեւը չէ Լեռնային Ղարաբաղի ժողովրդին կարգավիճակ շնորհում: ԼՂ ժողովուրդը սկսել է պայքարել իր իրավունքների համար 1988 թվականից, եւ եթե տեղյակ չէ պարոն Ալիեւն ու ադրբեջանական կողմը, տեղեկացնեմ, որ բանակցային սկզբունքներից մեկը ինքնորոշման իրավունքի իրացումն է»,-ասաց Շարմազանովն ու հավելեց. «Կարծում եմ՝ Ալիեւի հայտարարությունը, մանավանդ ռուսական լրատվամիջոցներին, անտեղի է»:
Լրագրողների հիշեցմանը, որ մոտ մեկ ամիս առաջ ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել էր, որ ԼՂ խնդրի լուծումը պետք է լինի տարածքներ զիջելով, որի դիմաց պետք է միջազգային կարգավիճակ շնորհվի Լեռնային Ղարաբաղին, Շարմազանովն արձագանքեց. «Երբ ստեղծվել է ՄԱԿ-ը, կազմում կար 56-57 պետություն, այսօր ՄԱԿ-ն ունի 193 անդամ: Ուզի պարոն Ալիեւը կամ այն միջազգային պաշտոնյան, թե ոչ, աշխարհը գնում է ինքնորոշման իրավունքի հաղթարշավի ճանապարհով եւ անհնար է գետի հունին հակառակ լողալ: Արցախի միջազգային ճանաչումն ընդամենը ժամանակի խնդիր է»:
Շարմազանովը հստակեցրեց, որ Արցախ որեւէ կարգավիճակով չի լինելու Ադրբեջանի կազմում:
Ինչ վերաբերում է Սարգսյան-Ալիեւ հնարավոր երկկողմ հանդիպմանը, ԱԺ փոխնախագահն ասաց. «Երկու օր առաջ էլ ՀԱՊԿ գագաթնաժողովը կոչ արեց, որ Վիեննայի ու Սանկտ Պետերբուրգի պայմանավորվածությունները պետք է կյանքի կոչվեն: Խնդիրն ադրբեջանական կողմում է, եթե նրանք փոխզիջում ասելով հասկանում են ինքնավար հանրապետություն, ապա ինքնախաբեության մեջ են, փոխզիջումը ԼՂՀ միջազգային ճանաչումն է, իսկ որոշողը Ղարաբաղի իշխանություններն ու ժողովուրդն են:
Ոչ ես եմ որոշողը, ոչ դուք, ԼՂՀ-ն անկախ հանրապետություն է, երբ կդառնան բանակցությունների ամբողջական կողմ, կորոշեն»:
Հիշեցմանը, որ Ալիեւը չէր բացառել, որ Ադրբեջանը կարող է անդամակցել ԵՏՄ-ին, Շարմազանովն ասաց. «Դե եթե չի բացառում, քաղաքականությունը հնարավորի արվեստ է, ուրեմն չպետք է բացառի նաեւ ԼՂՀ անկախության ճանաչումը»:
