Հայաստանի գործող չեմպիոն Երեւանի «Ալաշկերտ» ֆուտբոլային ակումբի գլխավոր մարզիչ Աբրահամ Խաշմանյանը հոկտեմբերի 19-ին տեղի ունեցած Հայաստանի Գավաթի ընթացիկ խաղարկության քառորդ եզրաափակչի «Փյունիկ» - «Ալաշկերտ» խաղից հետո հրաժարական տվեց:
NEWS.am-ի թղթակից Վերա Մարտիրոսյանի հետ զրույցում Աբրահամ Խաշմանյանը պատմեց իր հրաժարականի պատճառների մասին:
Գավաթի խաղից հետո ակումբի նախագահը մտավ հանդերձարան ու դժգոհություն հայտնեց խաղից. չորս ֆուտբոլիստի ազատեց թիմից` Արսեն Բալակաբեկյանին, Սամվել Մելքոնյանին, Սավին Անտոնրին եւ Յուրա Ֆոմենկոյին: Դրանից հետո անվստահություն հայտնեց ինձ ու մարզչական շտաբին եւ ասաց, որ մյուս խաղը թիմը կպատրաստի մեկ այլ մարզիչ, իսկ ես պետք է լինեմ սպասողական վիճակում: Բնական է, որ իմ արձագանքը միանգամից եղավ: Խաղից հետո հրաժարական տվեցի: Ես կարծում եմ, որ ցանկացած իրեն հարգող մարզիչ կաներ նույն բանը, ինչ արեցի ես:
Ինչ վերաբերում է խաղին, մենք շատ լավ խաղ անցկացրեցինք: Ունեինք առավելություն թե՛ տարածքային, թե՛ խաղային: Միայն Ֆոմենկոն մի քանի անգամ մնաց մեն մենակ դարպասապահի առջեւ, բայց ցավոք չօգտագործեցինք պահերը: Դա ֆուտբոլ է: Այսօր աշխարհի լավագույն թիմերը չեն կարողանում հաղթել բոլոր խաղերը կամ նվաճել բոլոր տիտղոսները, ուր մնաց «Ալաշկերտը» տանի: Առիթից օգտվելով շնորհակալություն եմ հայտնում իմ ֆուտբոլիստներից՝ իրենց պրոֆեսիոնալզմի համար: Մենք շատ լավ թիմ ու կոլեկտիվ ունեինք: Շնորհակալ եմ նաեւ իմ մարզչական շտաբին, ովքեր իրենք գործը շատ լավ էին անում: Շնորհակալ եմ նաեւ ակումբին համագործակցության համար:
Սա երրորդ տարին է, որ ես գլխավորում էի «Ալաշկերտը»: Մենք ունեցել ենք հաջողություններ՝ թե Եվոպական ասպարեզում, թե ներքին առաջնությունում: Կարծում եմ՝ լավ աշխատանք ենք կատարել:
Սա առաջի՞ն միջադեպն էր թիմի նախագահի հետ կապված, թե նմանատիպ դեպքեր էլի եղել էին:
Նման խնդիրներ եղել են: Ես փորձել եմ միշտ հարթել դրանք: Ստացվում էր: Սա առաջին դեպքը չէր: Ոչ մի խնդիր չունեմ ակումբի ու նախագահի հետ: Միայն այն բանի համար, որ Հայաստանում կարողանում են թիմ պահել, արդեն արժանի է հարգանքի: Չնայած ասեմ, որ քիչ մարդիկ կարող էին աշխատել նման պայմաններում, ու այդ եզակիներից մեկը ես էի: Պետք է միշտ ճկուն լինել ու արդյունք ապահովել: Իսկ այդ բոլորը միասին անել շատ դժվար է: Բայց երեք տարվա մեջ հաջողվեց:
Ի՞նչ պլաններ ունեք: Ո՞ր թիմերում եք տեսնում Ձեր հետագա աշխատանքը:
Հրաժարականը նորմալ գործընթաց է: Մեր գործի մի մասն է: Հայաստանում միշտ չէ, որ բոլոր մարզիչները գործ ունեն: Կսպասեմ կտեսնեմ ինչ առաջարկներ կլինեն: Երեկ է ամեն ինչ տեղի ունեցել: Սպասենք:
Վերա Մարտիրոսյան