Գեղարքունիքի մարզի Վարսեր գյուղում այսօր՝ հոկտեմբերի 21-ին, հուղարկավորել են Երեւան-Սեւան ավտոճանապարհին 3 օր առաջ տեղի ունեցած ողբերգական վթարի հետեւանքով մահացած 18-ամյա Հռիփսիմե Գասպարյանին:
Մահացած աղջկա եղբայրը՝ Հրանտ Գասպարյանը, որը դեպքի պահին քրոջ հետ է եղել, այժմ վնասվածքներով հիվանդանոցում է գտնվում:
Ավելի վաղ տեղեկացրել էինք, որ Կոտայքի մարզում 2016թ. հոկտեմբերի 18-ի առավոտյան ժամը 08.30-ի սահմանում խոշոր ու ողբերգական ավտովթար է տեղի ունեցել. Երեւան-Սեւան ավտոճանապարհի 44-րդ կմ հատվածում բախվել են «Օպել» մակնիշի եւ Mercedes Benz Sprinter մակնիշի ավտոմեքենաները։ Վթարի հետեւանքով մահացել էր Վարսեր գյուղի 18-ամյա բնակչուհի Հռիփսիմե Գասպարյանը, մյուսները տեղափոխվել են հիվանդանոց:
Mercedes Benz Sprinter մակնիշի ավտոմեքենան պատկանում էր նույն գյուղի բնակիչ Գագիկ Ստեփանյանին, որն էլ բարեգործական նպատակով սկսել էր վարել այն եւ ուսանողներին տեղափոխել Երեւան: Ի դեպ, Վարսերում լուրեր են շրջանառվում, որ բարեգործական երթուղայինի գաղափարը գյուղապետի թեկնածու Հուսիկ Սեդրակյանինն է:
