Ադրբեջանը երբեւիցե չի հրաժարվել դիվերսիոն գործողություններին, ավելին, շարունակում է իր ապակառուցողական քաղաքականությունը դիվանագիտական, քաղաքական, տեղեկատվական ոլորտներում: NEWS.am-ի թղթակցի հետ զրույցում նման կարծիք հայտնեց Արցախի նախագահի մամուլի խոսնակ Դավիթ Բաբայանը՝ անդրադառնալով այս գիշեր Ադրբեջանի զինուժի կողմից դիվերսիայի փորձերին, որոնք հայկական կողմը հաջողությամբ հետ է մղել:
«Մերթ ընդ մերթ, հատկապես վերջին երկու ամսվա ընթացքում Ադրբեջանը հիբրիդային պատերազմի ձեւեր է օգտագործում տեղեկատվական դաշտում, այսինքն որեւէ բան չի փոխվել իր գործողություններում: Սա Ադրբեջանի էությունն է. ֆաշիստական, նացիստական, հանցագործ, ահաբեկչական պետություն է, դրա համար նման քայլերի պետք է դիմի»,- ասաց Դավիթ Բաբայանը:
Ըստ պաշտոնական Ստեփանակերտի՝ պետք չէ տրամաբանություն փնտրել Ադրբեջանի գործողություններում. եթե առողջ տրամաբանություն ունենար, համանախագահների այցից առաջ հրադադարի ռեժիմը չէր խախտի:
«Առողջ տրամաբանությամբ հնարավոր չէ բացատրել. հիվանդ պետություն է, հիվանդ հասարակություն ունի, իսկ նման հանցագործ պետություններում առողջ տրամաբանություն չկա, կան նենգ մտքեր: Հանցագործը, կրկնահանցագործը եթե բանտում է, բանտից դուրս է գալիս, էլի հանցագործություն պիտի անի: Եթե մեկ ամիս, կամ երկու շաբաթ չի արել, դա չի նշանակում, որ փոխվել է»,- ասաց նախագահի մամուլի խոսնակը:
Ավելի վաղ NEWS.am-ը հայտնել էր, որ 2016թ. հոկտեմբերի 20-ին` ժամը 23:00-23:30 ընկած ժամանակահատվածում, ղարաբաղա-ադրբեջանական հակամարտ զորքերի շփման գծի արեւելյան եւ հարավային ուղղություններում հակառակորդը ձեռնարկել է դիվերսիոն ներփաթանցման փորձեր: ՊԲ առաջապահ ստորաբաժանումները ժամանակին հավաստանշել են ադրբեջանական հատուկ ջոկատայինների առաջխաղացումը եւ կորուստներ պատճառելով հետ շպրտել իրենց ելման դիրքեր:
Դիվերսիոն խմբին դիմագրավելու ընթացքում ՊԲ-ն կորուստներ չի ունեցել:
