Ադրբեջանական կողմը դիվերսիայի փորձ է արել: Հոկտեմբերի 20-ին, ժամը 23:00-23:30-ն ընկած ժամանակահատվածում ղարաբաղա-ադրբեջանական զորքերի շփման գծի արեւելյան եւ հարավային ուղղություններում հակառակորդը ներփաթանցման փորձեր է ձեռնարկել: Արցախի պաշտպանության բանակի առաջապահ ստորաբաժանումները ժամանակին արձագանքել են եւ կորուստներով հետ շպրտել հակառակորդի հատուկ ջոկատայիններին: Արցախյան կողմը կորուստներ չի կրել:
Պաշտոնական Ստեփանակերտը սա գնահատում է որպես դիվանագիտական, քաղաքական, տեղեկատվական ոլորտներում Ադրբեջանի ապակառուցողական քաղաքականության շարունակություն:
Էդուարդ Շարմազանովի գնահատմամբ՝ սա Վիեննայում եւ Սանկտ-Պետերբուրգում ձեռք բերված պայմանավորվածությունների սաբոտաժ է: Նա միջազգային հանրությանը, մասնավորապես Միացյալ Նահանգներին եւ Ռուսաստանին կոչ է արել քայլեր ձեռնարկել՝ Ադրբեջանին կարգի հրավիրելու եւ այդ պայմանավորվածություններն իրականացնելու համար:
Շարմազանովը նաեւ կարծիք է հայտնել, որ Լեռնային Ղարաբաղում լայնածավալ պատերազմը տեսականորեն հնարավոր է, գործնականում՝ ոչ։ Այս կարծիքը կիսում է նաեւ քաղաքագետ Արա Պապյանը: Նրա կարծիքով՝ այս կերպ ԵԱՀԿ Մինսկի խմբի համանախագահների այցից առաջ Ադրբեջանը պարզապես ուզում է ցույց տալ, որ սա քնած ու սառեցված հակամարտություն չէ:
Ղարաբաղյան հակամարտության կարգավորմամբ զբաղվող ԵԱՀԿ Մինսկի խումբը նոր ֆրանսիացի համանախագահ կունենա: Ֆրանսիայի նախագահը հոկտեմբերի 20-ին ստորագրած հրամանագրով Մինսկի խմբի նոր համանախագահ է նշանակել Ստեֆան Վիսկոնտին: Գործող ֆրանսիացի համանախագահ Պիեռ Անդրիոն այս պաշտոնը ստանձնել էր 2014 թվականին:
Ազգային ժողովն այսօր հավանության է արժանացրել նոր կառավարության ծրագիրը:
Կառավարության ծրագիրը սատարելու մասին նշել են Հանրապետականն ու Դաշնակցությունը, ՀԱԿ-ը հայտարարել է, որ չի վստահում իշխող կուսակցության կողմից առաջադրված որեւէ կառավարության եւ դեմ է քվեարկելու, ՕԵԿ-ը որոշել է ձեռնպահ մնալ, իսկ ԲՀԿ-ն՝ չմասնակցել քվեարկությանը:
Իսկ քվեարկությունից առաջ ամփոփիչ ելույթում Կարեն Կարապետյանն անդրադարձել է ծրագրի շուրջ պատգամավորների քննադատություններին: Նա նաեւ շնորհակալություն է հայտնել նոր կառավարության ծրագրին աջակցություն հայտնած խորհրդարանականներին:
«Պատանի լրագրողների» դպրոցում դանակահարված Լեւոն Սահակյանի կյանքին վտանգ է սպառնում: 22-ամյա երիտասարդը վնասվածքներ է ստացել սրտի ու թոքի շրջանում: Նրան վիրահատել են, կատարվել է սրտի ու թոքի վնասվածքների կարում: Սահակյանը միացված է արհեստական շնչառության ապարատին, սրտի կծկողականությունը շատ թույլ է: Տեղեկությունների համաձայն՝ երիտասարդը դանակահարվել է գումարի պատճառով: «Պատանի լրագրողների» դպրոցում աշխատող նրա նշանածին աշխատավարձ չեն վճարել: Հոկտեմբերի 19-ի երեկոյան Լեւոնը գնացել է դպրոցի տնօրեն Վահան Ղազարյանի մոտ՝ պարզաբանումներ ստանալու, այդ ընթացքում էլ տեղի է ունեցել դանակահարությունը: Դպրոցի շենքում արնանման հետքեր են հայտնաբերել, իսկ Վահան Ղազարյանի աշխատասենյակում՝ արնանման հետքերով ծալովի դանակ: Քրեական գործ է հարուցվել: Սպանության փորձի կասկածանքով Ղազարյանը ձերբակալվել է:
Մոսկվա-Երեւան երթուղու ավտոբուսի վթարի հետեւանքով տուժած երկրորդ վարորդը՝ Ավագ Ծատինյանը, աչքի վիրահատության կենթարկվի: Երեւան տեղափոխվելուց հետո այսօր հետազոտության է ենթարկվել եւ պարզվել է, որ աչքի վնասվածքներ ունի: Նրա կինը տեղեկացրեց, որ վթարի պահին ավտոբուսը վարողի կողքին քնած է եղել, դեպքից ոչինչ չի հիշում: Սակայն պատահարից հետո կարողացել է ինքնուրույն դուրս գալ ավտոբուսից: Իսկ վթարի հետեւանքով տուժած ուղեւորներից երկուսի վիճակը շարունակում է կայուն ծանր մնալ: Նրանք Բեսլանի հիվանդանոցում են: Հիշեցնենք, որ հոկտեմբերի 14-ին Հյուսիսային Օսիայում «Մերսեդես» ավտոբուսի եւ «Սկանիա» բեռնատարի բախման հետեւանքով 5 մարդ էր զոհվել, 27-ը՝ վիրավորվել
Երեւան-Սեւան ավտոճանապարհին 3 օր առաջ տեղի ունեցած ողբերգական վթարի հետեւանքով մահացած 18-ամյա Հռիփսիմե Գասպարյանին այսօր հողին են հանձնել: Նա Գեղարքունիքի մարզի Վարսեր գյուղից էր: Եղբայրը՝ Հրանտ Գասպարյանը, գլխուղեղի շրջանում ստացած վնասվածքներով դեռեւս հիվանդանոցում է: Հիշեցնենք, որ Երեւան-Սեւան ավտոճանապարհին իրար էին բախվել «Opel» եւ «Mercedes» մակնիշի ավտոմեքենաները։ Վթարի հետեւանքով մահացել է մեկ, վիրավորվել՝ 9 մարդ:
Հոկտեմբերի 21-ին դոլարը շարունակել է զիջել դիրքերը: Արդյունքում դոլարի փոխարժեքը կազմել է 475 դրամ, եվրոյինը՝ 518, ռուբլունը՝ 7 դրամ 63 լումա, ֆունտինը՝ 581 դրամ։
Հոկտեմբերի 22-ին Լոռիում, Տավուշում, Սյունիքում եւ Արցախում տեղումներ են սպասվում: Հանրապետության ամբողջ տարածքում տեղումներ կլինեն հոկտեմբերի 24-26-ը: Օդի ջերմաստիճանն էապես չի փոխվի: Երեւանում վաղը տեղումներ չեն սպասվում: