Ազգային ժողովի «Ժառանգություն» խմբակցության պատգամավոր Զարուհի Փոստանջյանը կարծում է, որ ապրիլյան պատերազմում կորցրած տարածքների առնչությամբ խորհրդարանը պետք է հատուկ նիստ հրավիրի, որի ընթացքում էլ լուծումներ կառաջարկվեն ստեղծված իրավիճակի կապակցությամբ:
«25 տարվա ընթացքում մենք առաջին անգամ ունեցանք տարածքային կորուստներ, որի վերաբերյալ քննարկում եւ կորուստը վերականգնելու վերաբերյալ լուծում մենք չունեցանք: Մենք չունենք նաեւ պատասխան համապատասխան պաշտոնյաներից, նրանցից մեկն էլ հայտարարեց՝ եթե ցանկություն կա, գնացեք ազատագրեք: Մեր հերոս տղաները ցանկություն հայտնեցին եւ այժմ կալանավորված են: Սա եւս պետք է քննարկման առարկա դառնա»,- այսօր՝ հոկտեմբերի 24-ին, Ազգային ժողովում ասաց Զարուհի Փոստանջյանը՝ հորդորելով հատուկ նիստի ժամանակ կամ համապատասխան հանձնաժողովներում այս հարցը քննարկման առարկա դարձնել:
Ազգային ժողովի նախագահ Գալուստ Սահակյանը հակադարձեց, թե չի կարծում՝ քննարկելու որեւէ բան կա, առավել եւս չի կարծում, որ մեղավորներ կան: Այնուամենայնիվ, նա խորհուրդ տվեց ընդդիմադիր պատգամավորին՝ իր բարձրացրած հարցերը քննարկել որեւէ հանձնաժողովում: