Հայաստանի պաշտպանության նախարարը երբեք չպետք է բացառի պատերազմի հնարավորությունը, բայց հաշվի առնելով այսօրվա իրավիճակը, ԼՂ հակամարտության գոտում ռազմական գործողությունների վերսկսումը քիչ հավանական է: NEWS.am-ի թղթակցի հարցին ի պատասխան, նշել է Հայաստանի պաշտպանության նախարար Սեյրան Օհանյանը:
Նրա խոսքով, Ադրբեջանի սադրիչ գործողությունները նպատակ ունեն հայկական կողմի հետ խոսել վերջնագրերի լեզվով եւ լարվածություն ստեղծել հակամարտության գոտում: «Բայց մենք արդեն ապացուցել ենք, որ որ մեզ հետ չի կարելի խոսել վերջնագրերի լեզվով եւ մենք չենք վախենում ռազմական շանտաժից»,- ասել է նախարարը:
Միաժամանակ, նա ընդգծել է, որ միջազգային հանրությունը պետք է խիստ գնահատական տա Ադրբեջանի գործողություններին, որը պարբերաբար խախտում է հրադադարի ռեժիմը: «Միջազգային հանրությունը պետք է արդար լինի այդ հարցում եւ արձագանքի ղարաբաղա-ադրբեջանական շփման գծում հրադադարի ռեժիմի խախտման յուրաքանչյուր դեպքի, եթե անգամ դրանք լինեն հայկական կողմից: Մենք այդ հարցը բարձրացնում ենք միջազգային կառույցների առաջ»,- նշել է Ս. Օհանյանը, հավելելով, որ հայկական կողմը նույնիսկ չի մտածում հրադադարը խախտելու մասին: