Անցյալ տարի իշխանությունները Գագիկ Ծառուկյանին արգելեցին ղեկավարել «Բարգավաճ Հայաստան» կուսակցությունը: Հիմա նորից խոսվում է այն մասին, որ նա կարող է քաղաքականությամբ զբաղվել եւ ղեկավարել կուսակցությունը: Հոկտեմբերի 28-ին Հայաստանի Ազգային ժողովում կայացած ավանդական ճեպազրույցների այս մասին հայտարարել է «Ժառանգություն» խմբակցության պատգամավոր Զարուհի Փոստանջյանը:
Ըստ նրա՝ հենց սա էլ ավտորիտար համակարգի հերթական արտահայտությունն է: «Մենք բռնատիրական երկրում ենք ապրում»,- ընդգծել է Փոստանջյանը:
Հարցին, քաղաքական կյանք Գագիկ Ծառուկյանի վերադարձի անհրաժեշտությունը տեսնո՞ւմ է, պատգամավորը պատասխանել է. «Գուցե համակիրների համար նրա վերադարձի անհրաժեշտություն կա, բայց ես նրա համակիրը չեմ: Չեմ կարծում, որ Գագիկ Ծառուկյանի վերադարձի անհրաժեշտություն կա»:
Հիշեցնենք, որ անցյալ տարի նախագահ Սերժ Սարգսյանի սուր քննադատությունից հետո քաղաքականությունից հեռացած Գագիկ Ծառուկյանն օրերս չէր բացառել ակտիվ քաղաքականություն իր վերադարձի հնարավորությունը: