Վիճվարչությունը ամեն տարի տնտեսական աճ է ցույց տալիս, իսկ որպեսզի աճ ցույց տա, հետ է գնում եւ 90-ականների տվյալները փոխում։ Այս մասին այսօր՝ հոկտեմբերի 31-ին, Ազգային ժողովում լրագրողների հետ ճեպազրույցում հայտարարել է նախկին վարչապետ, պատգամավոր Հրանտ Բագրատյանը։
«Ես բավարարված չեմ այս բյուջեից այն առումով, որովհետեւ տնտեսագիտական թեւը նույն է մնացել, ինչ Տիգրան Սարգսյանի օրոք, խորամուխ չի եղել։ Ինչպես միշտ մենք կներկայացնենք առաջարկներ եւ կգրենք, որ կա մոտեցման այլ տարբերակ։ Մենք պիտի աճենք, բայց մենք մեր առաջ խնդիր էլ չենք դնում աճելու։ Աճի տեմպն այստեղ ավելի քիչ է, քան աշխարհում։ Մենք դժգոհ ենք սրանից, իմ կարծիքով՝ այդ տնտեսագիտական թիմը վարչապետին նախագահին ճիշտը չի ասում, փոքրիկ մաֆիա է, որը ասում է հանգիստ ապրենք՝ առանց լարված աշխատելու»,-ասաց Հրանտ Բագրատյանը։
Հարցին, թե բյուջեում արտահայտված չէ բարեփոխումներ իրականացնելու վարչապետի խոստումները, պատասխանեց․ «Մենք պիտի պայքարենք եւ հուսով ենք՝ այդ պայքարի ընթացքում արդյունքները կփոխվեն։ Ես հանգիստ ցույց եմ տալիս 150 միլիարդ փող, որը կարելի էր ներդրումների վրա դնել։ Օրինակ, Կենտրոնական բանկը 12-րդ տարին է բյուջեին փող չի տալիս․․․Բոլորս կենտրոնացել ենք, որ ֆիննախը առանձնատուն է կառուցել Դիլիջանում, բա Կենտրոնական բանկն ի՞նչ է կառուցել»,-ասաց Բագրատյանը։
Բագրատյանը դժգոհեց, որ 12 տարի է իր առաջարկը չեն ընդունում եւ չեն մեծացնում ներքին պարտքը։ Նշեց, որ ներքին պարտքը 1 միլիարդ դրամ է, իսկ արտաքինը՝ 5,2 միլիարդ. «Եթե կես-կես լիներ, մենք էս օրին չէինք լինի, 12 տարի ասել եմ՝ տղաներ, սա սխալ մոտեցում է»։