Լիբանանի խորհրդարանը երկուշաբթի երկրի նախագահ է ընտրել: Sputnik գործակալության փոխանցմամբ՝ Լիբանանի նախագահ է դարձել գեներալ Միշել Աունը:
Երկիրը 2,5 տարի քաղաքական ճգնաժամի մեջ էր նախկին նախագահ Միշել Սուլեյմանի նախագահական ժամկետի ավարտից հետո: Լիբանանի Սահմանադրության համաձայն՝ նախագահ կարող է դառնալ միայն քրիստոնյա մարոնիտը, ում կընտրի խորհրդարանը:
Ճգնաժամի ամբողջ ընթացքում քաղաքական ուժերի տարաձայնությունների հետեւանքով քվորումի բացակայության պատճառով խորհրդարանականները չեն կարողացել նախագահ ընտրել: Ընտրություները կայացած են համարվում նվազագույնը 86 պատգամավորի ներկայության դեպքում:
Երկուշաբթի խորհրդարանի նիստին ներկայացել է 127 պատգամավոր: Աունին ընտրելու համար նրանք ստիպված են եղել 4 անգամ քվեարկել. երկրորդ փուլն անցկացվել է 3 անգամ՝ ներկա պատգամավորների եւ քվեատուփում ծրարների թվի անհամապատասխանության պատճառով:
Ներկայումս Լիբանանի խորհրդարանը գործնականում հավասարապես բաժանված է արեւմտամետ եւ սիրիամետ բլոկների: Ճգնաժամի ամբողջ ընթացքում Լիբանանի նախագահի պաշտոնի գլխավոր հավակնորդը 81-ամյա գեներալ Միշել Աունն էր, որը շիաների «Հըզբալլահ» կուսակցության քաղաքական դաշնակիցն է: Նրա թեկնածությանն աջակցում են սիրիամետ բլոկի ներկայացուցիչները:
Երկար ժամանակ Աունի հիմնական միցակիցն էր արեւմտամետ «Մարտի 14» բլոկի ներկայացուցիչ Սամիր Ժաաժան, որին աջակցում է սուննիների «Ալ Մուսթաքբալ» կուսակցությունը: Ընթացիկ տարվա հոկտեմբերին կուսակցության առաջնորդ Սաադ ալ-Հարիրին փոխել է որոշումը եւ հայտարարել, որ Աունին է աջակցում:
