2017 թվականին Հայաստանի քաղաքացիների կենսամակարդակը բարձրանալու է: Այս մասին այսօր՝ նոյեմբերի 2-ին Ազգային ժողովում լրագրողների հետ զրույցում ասաց աշխատանքի եւ սոցիալական հարցերի նախարար Արտեմ Ասատրյանը:
«Ես կարծում եմ, որ հաջորդ տարվա ծրագրի շրջանակներում այն բոլոր միջոցառումներն ու ուղղությունները, որոնք ներկայացված են, պետք է նաեւ սոցիալական բեռի թեթեւացման բերեն»,- ասաց նախարարը:
Նա միաժամանակ նշեց, որ վերլուծություն չկա, թե աղքատությունը քանի տոկոսով կկրճատվի նոր կառավարության ծրագրի իրականացման արդյունքում. «Նման վերլուծություն չի արվում, աղքատության չափումն իրականացնում է Ազգային վիճակագրական ծառայությունը՝ Համաշխարհային բանկի մեթոդաբանությամբ: Եթե չեմ սխալվում, առաջիկա շաբաթվա ընթացքում արդեն ԱՎԾ-ն կներկայացնի 2015 թվականի տվյալները»:
Հարցին, թե ի՞նչ չափով կբարելավվի հասարակության կենսամակարդակը, Արտեմ Ասատրյանը պատասխանեց, որ նման գնահատական եւս չեն կարող տալ, քանի որ դա ոչ մասնագիտական կլինի:
Նախարարն ասաց, որ սոցիալական պաշտպանության ոլորոտը եղել է, կա եւ միշտ կլինի կառավարության առաջնահերթություններից մեկը: Ինչ վերաբերում է թոշակները չբարձրացնելուն, ինչի մասին ֆինանսների նախարարն ասել էր, թե թոշակների բարձրացումը զոհաբերել է տնտեսական կայունության ապահովմանը, Արտեմ Ասատրյանն ասաց. «Այսինքն՝ այն ծախսային ուղղությունները, որոնք առաջնահերթություն են, վստահ եղեք, որ առաջին հերթին միջոցներն ուղղվում են այդ ոլորտներին: Եթե 2017 թվականի բյուջեի նախագծում 30 մլրդ լրացուցիչ միջոց չի գտնվել կենսաթոշակների չափերի բարձրացման համար, սա է ձեր հարցի պատասխանը: Այսինքն՝ մենք 2017 թվականի բյուջեի շրջանակներում լրացուցիչ միջոցներ չենք ունեցել եկամուտների առումով, հետեւաբար, սա արտահայտվել է նաեւ ծախսային քաղաքականության վրա»: