Ազգային ժողովում 2017 թվականի պետբյուջեի նախագծի քննարկումները շարունակվել են նաեւ այսօր, իսկ ուշադրության կենտրոնում եղել է, մասնավորապես, աշխատավարձերի եւ կենսաթոշակների բարձրացման հարցը: Արդեն հայտարարվել էր. այս տարի բարձրացում չի լինելու: Արտեմ Ասատրյանն ասում է՝ ավելորդ գումարներ չկան:
Ֆինանսների նախարարն էլ հավելել է. երբ կարողանանք թեւակոխել ավելի բարձր տնտեսական աճի փուլ, կկարողանանք աշխատավարձերի շարունակական բարձրացում ապահովել:
Վարդան Արամյանը եւս մեկ անգամ խոսել է իրենց թիմի ազնվության եւ հետագա տարիներին իրավիճակի փոփոխության շուրջ հույսի անհրաժեշտության մասին:
ՀԱԿ-ից Արամ Մանուկյանն էլ հարցադրում է արել. ինչպե՞ս կարող էին աշխատավարձ ու թոշակ բարձրացնել, եթե երկրում տնտեսական շարժ չկա, ներդրումներ չկան, երիտասարդությունն էլ արտագաղթում է:
Իգնատի Առաքելյանից լրագրողները հետաքրքրվել են գյուղնախարարությանը պարարտանյութերի ու դիզվառելիքի դիմաց ֆերմերների պարտքի մասին: Նախարարը տեղեկացրել է, որ չարաշահումների մասին հավաստի դեպքերով արդեն դատարան են դիմել: Նա, սակայն, դժվարացել է ասել, թե որքանով է հնարավոր վերադարձնել ամբողջ պարտքը: Ասում է՝ մարդիկ կան, որոնցից էլ բան չկա վերցնելու:
Նախարարը նաեւ հայտարարել է. եթե բացահայտվի, որ այդ չարաշահումների հետ խոշոր հողատերերի կամ պաշտոնյաների անուններ են կապված, կգործեն օրենքի համաձայն:
Նախագահականում քննարկել են, այսպես կոչված, «կարմիր գծերի» եւ վարորդների տուգանքների հարցերը: Սերժ Սարգսյանն ասել է՝ ուսումնասիրել ենք միջազգային փորձը, որոշել պետություն-մասնավոր համագործակցության միջոցով խնդիրներին լուծում տալ: Նա հավաստել է, որ վերահսկողության համակարգերի ներդրումը պայմանավորված չէր ֆինանսական ակնկալիքներով. տուգանքները ոչ թե վարորդներից փող կորզելու միջոց են, այլ կանխարգելիչ բնույթ ունեն: Հիմա առաջարկվում է փոխել ֆինանսական հոսքերի կառավարիչները:
Հանձնարարվել է հարցը լուծել՝ հաշվի առնելով սեփականության անձեռնմխելիությունը եւ պետության ու համայնքի շահերը: Նախագահն առավելագույնը տասը օր ժամանակ է տվել՝ համապատասխան բանակցություններ վարելու եւ որոշումներ կայացնելու համար:
Սյունիքի նախկին մարզպետ Սուրիկ Խաչատրյանը պատմափիլիսոփայական գիտությունների դոկտորի որակավորումը Հայաստանում չի ստացել: Բարձրագույն որակավորման հանձնաժողովի նախագահը հավաստում է. Սուրիկ Խաչատրյանին իրենք գիտական աստիճանի վկայագիր չեն տվել, այն արտասահմանից բերված «անկապ թուղթ» է, որի մասին իրենք տեղյակ չեն: Լիլիթ Առաքելյանի խոսքով, ըստ օրենքի՝ գիտական աշխատանքների բոլոր պաշտպանությունները պետք է բաց լինեն: Մինչդեռ հայտնի է, որ, օրինակ, Երեւանի քաղաքապետ Տարոն Մարգարյանի գիտական աստիճանավորումը փակ է եղել:
Անժամանակ տեղացած ձյունը ֆորսմաժորային իրավիճակ է ստեղծել ամբողջ հանրապետությունում: Նախօրեին առաջին ձյան մասին Երեւանի փոխքաղաքապետի լիրիկական զեղումները ժամերի ընթացքում արտակարգ իրավիճակի վերածվեցին: Մարզերում եւ մայրաքաղաքի շատ թաղամասերում ամբողջ գիշեր հոսանք չի եղել, տեղացած ձյան հետեւանքով ծառեր են կոտրվել, ինչի արդյունքում հոսանքալարեր եւ փողոցներում ու բակերում կայանված մեքենաներ են վնասվել: ՀԷՑ-ի մամուլի քարտուղարի պարզաբանմամբ՝ ծառերի տերեւները դեռ չեն թափվել, իսկ տեղացած ձյունը ծանրացրել է ճյուղերը, եւ թեքված կամ կոտրված ճյուղերը վնասել են հոսանքալարերը: Նատալյա Սարջանյանը տեղեկացրել է, որ շուրջ 2 հազար քաղաքացուց հոսանք չլինելու մասին ահազանգ են ստացել: Այսօր արդեն հոսանքի մատակարարումն ամբողջությամբ վերականգնվել է: Երեւանի քաղաքապետարանն ու մարզերի պատասխանատուներն էլ պնդում են, որ ճանապարհների մաքրման աշխատանքներն իրականացվում են հավուր պատշաճի:
Ազգային ժողովում էլ Լյուդմիլա Սարգսյանը հանդես է եկել վարորդների իրավունքների պաշտպանությամբ: Անհանգստացած է. ձյան պատճառով մեկ օրվա ընթացքում անվադողերը եռակի թանկացել են:
Մահվան ելքով վթարներ: Վաղ առավոտյան Գորայք-Սիսիան ավտոճանապարհին «Mitsubishi Grandis» մակնիշի ավտոմեքենան դուրս է եկել երթեւեկելի գոտուց եւ շրջվել ձորը: Վարորդը վիրավորվել է, երկու ուղեւորները՝ մահացել: Իսկ կեսգիշերն անց Արմավիրի մարզի Մյասնիկյան-Արմավիր ճանապարհին «Ֆորդ» մակնիշի ավտոմեքենան վրաերթի է ենթարկել 64-ամյա Դադիբեկ Մանուկյանին: Հիվանդանոց տեղափոխվելու ճանապարհին նա մահացել է:
Նոյեմբերի 2-ին դոլարի ու եվրոյի փոխարժեքը կրկին աճել է: Արդյունքում դոլարի փոխարժեքը կազմել է 475 դրամ, եվրոյինը՝ 527, ռուբլունը՝ 7 դրամ 49 լումա, ֆունտինը՝ 583 դրամ։
Նոյեմբերի 3-ին հանրապետության տարածքում սպասվում է առանց տեղումների եղանակ: Գիշերն օդի ջերմաստիճանը կնվազի 5-7 աստիճանով: Երեւանում նույնպես վաղը տեղումներ չեն սպասվում:
