Հայաստանի եւ Եվրամիության միջեւ համագործակցության նոր համաձայնագիրը կստորագրվի մոտ ապագայում։ Այս մասին այսօր՝ նոյեմբերի 3-ին, 2017թ․ պետբյուջեի նախագծի խորհրդարանական լսումներից հետո լրագրողների հետ զրույցում ասաց Հայաստանի արտաքին գործերի փոխնախարար Կարեն Նազարյանը։
«Կարեւոր հանգրվան ենք մենք արդեն տեղափոխվում, գուցե դեկտեմբերին կայանալիք հերթական բանակցային փուլը հնարավորություն կտա տեսանելի դարձնել բանակցային գործընթացի ամփոփման հնարավորությունը։ Բավականին ինտենսիվ են եղել բանակցությունները։ Մենք լավատես ենք, որ մոտ ապագայում մենք ավարտին հասցնենք ամբողջ գործընթացը»,- ասաց Կարեն Նազարյանը։
Փոխնախարարի գնահատմամբ, ամբողջ գործընթացի ավարտը հնարավոր է լինի արդեն հաջորդ տարվա առաջին եռամսյակում։ Ամեն ինչ, Նազարյանի կարծիքով, կախված է դինամիկայից, կողմերի ճկունությունից․ «Կան հարցեր, բնական է, որ այդ հարցեր կան, երկու կողմերն էլ փորձում են առավելագույնս արտացոլել իրենց մոտեցումները, շահերը, առաջնայնությունները փաստաթղթում եւ սա փորձագիտական առումով բավականին պահանջկոտ մի գործընթաց է։ Գաղտնիք չէ, որ այս բանակցությունների ընթացքում մենք փորձում ենք անել ամեն ինչ, որ համատեղելի բառերն ի հայտ բերելու մի կողմից ԵԱՏՄ անդամակցության առումով եւ մյուս կողմից Եվոպայի հետ մեր ապագա համագործակցության տեսանկյունից»։
