Ազգային ժողովում այսօր 2017 թվականի պետբյուջեի նախագծի քննարկումները վերաբերել են առողջապահության, կրթության եւ գիտության, մշակույթի, սպորտի եւ երիտասարդության հարցերի, սփյուռքի նախարարություններին: Առողջապահության նախարարին ուղղված հարցերը բազմաթիվ էին՝ ինչպես պատգամավորների, այնպես էլ լրագրողների կողմից: Նաիրա Զոհրաբյանին հետաքրքրել է պետպատվերի համակարգը: Պատգամավորը համոզված է. համակարգը ձախողված է:

Ի դեպ, առողջապահության ոլորտի ծախսերը հաջորդ տարի կկազմեն 85 մլրդ 680 մլն դրամ. բյուջեն 3%-ով կրճատվել է։ Որքանո՞վ են կրճատումներն անդրադառնալու նախարարի խորհրդականների թվի վրա: Այս մասին Լեւոն Ալթունյանին հարցրել են արդեն լրագրողները: Պարզվում է՝ նախարարը տեղյակ չէ, թե քանի խորհրդական ունի: Լրագրողները տեղեկացրել են. 8 խորհրդական:

Տեղեկություններ կան, որ պաշտպանության նախկին նախարար Սեյրան Օհանյանի կինն արձակուրդում է, բայց չի ցանկանում վերադառնալ եւ աշխատել նոր նախարարի հետ: Նախարարը ցավում է, նաեւ հավաստում. Ռուզաննա Խաչատրյանին ոչ ոք աշխատասենյակից չի հանել:

Սփյուռքի նախարարությունը ծրագրերի իրականացման համար 1 մլրդ 300 մլն դրամ կստանա. բյուջեն 13%-ով կրճատվել է: Կրճատումների մի մասի պատճառը ծրագրերում ոչ ամենամյա միջոցառումների բացակայությունն է: Սա՝ հանձնաժողովում քննարկումներից: Իսկ լրագրողներին հետաքրքրել է Հայաստան տեղափոխված սիրիահայերի շրջանում բնակարանի, աշխատանքի եւ այլնի հետ կապված դժգոհությունների հարցը:

Կառավարության նոր ղեկավարը խոսել է ներդրումներն ակտիվացնելու մասին: Սփյուռքի մեր հայրենակիցների շրջանում, Հրանուշ Հակոբյանի հավաստմամբ, դա հետաքրքրություն է առաջացրել:

Կրթության ոլորտի հաջորդ տարվա հատկացումները կկազմեն շուրջ 128 մլրդ 700 մլն դրամ։ Նախարար Լեւոն Մկրտչյանը տեղեկացրել է, որ ապրիլյան իրադարձությունների ժամանակ մարտական հերթապահություն կատարած ուսանողներն ուսման վարձի զեղչ կստանան:

Սպորտի եւ երիտասարդության հարցերի նախարարությանը 2017 թվականին կհատկացվի 5 մլրդ 454 մլն դրամ: Սակայն նախարարին լրագրողները հարցեր են ուղղել ոչ թե բյուջեի, այլ Հայաստանի Ֆուտբոլի ֆեդերացիայի նախագահի երեկվա հայտարարության հետ կապված: Ռուբեն Հայրապետյանը Հրաչյա Ռոստոմյանին խորհուրդ էր տվել զբաղվել ատամնաբույժի գործունեությամբ՝ հայտարարելով, որ Սպորտի նախարարությունն իրավունք չունի զբաղվել ֆուտբոլով:

Այսօր բացվել է Վրաստանի հետ սահմանին գործող «Բագրատաշեն» հսկիչ անցակետը: Սա գործարկված երկրորդ արդիականացված մաքսակետն է: «Գոգավան» հսկիչ անցակետը գործում է այս տարվա հոկտեմբերից, իսկ «Բավրա»-ում աշխատանքները դեռեւս շարունակվում են, այն նախատեսվում է բացել մինչեւ այս տարեվերջ: Մաքսային անցակետի բացմանը մասնակցել է նաեւ նախագահ Սերժ Սարգսյանը:

Ծրագրի բյուջեն 52 մլն 130 հազար եվրո է, որից շուրջ 31 միլիոնը Եվրոպական ներդրումային բանկի տրամադրած վարկն է, շուրջ 4.5 մլն-ը հատկացրել է Հայաստանի կառավարությունը, մնացյալ բաժինը դրամաշնորհային միջոցներ են:

Ի դեպ, «Բագրատաշեն»-ում է եղել նաեւ Վրաստանի վարչապետը: Սերժ Սարգսյանն ու Գեորգի Կվիրիկաշվիլին կարճ առանձնազրույցից հետո այցելել են սահմանամերձ Դեբեդ գետի վրա ապագա Բարեկամության կամրջի կառուցման վայր: Կամուրջը շահագործման կհանձնվի 2018 թվականի ամռանը կամ աշնանը: Այն նույնպես վարկային միջոցներով է կառուցվում. Վերակառուցման ու զարգացման եվրոպական բանկը 10 մլն 300 հազար եվրոյի վարկ է տրամադրել։

«Սանիտեկի» հայաստանյան մասնաճյուղի ղեկավար Վահե Փայտյանը հայտնվել է դատարանում: Պարզվում է՝ Փայտյանը հրահանգավորում չի անցկացրել իր աշխատակիցների հետ: Որոշ ժամանակ անց ընկերության աշխատակից Նորայր Նուրիջանյանը խախտել է անվտանգության կանոնները, ինչի հետեւանքով գանգուղեղային բաց վնասվածք է ստացել եւ մահացել: Գործն արդեն դատարանում է: «Սանիտեկ»-ում, սակայն, հերքում են, որ Փայտյանն իրենց ղեկավարն է: Ըստ ընկերության հանրային հարաբերությունների ղեկավար Էլիանորա Շխրդմյանի, նա ընդամենն ավտոպարկի ղեկավարի օգնականն է:

Ձերբակալությունները Թուրքիայում շարունակվում են: Հերթը հասել է քրդական «Ժողովուրդների դեմոկրատական» կուսակցության պատգամավորներին եւ առաջնորդներին: Ձերբակալությունները մեծ արձագանք են գտել Թուրքիայում եւ նրա սահմաններից դուրս։ Անկարան առաջին անգամ միջազգային լրատվամիջոցների համար հաղորդագրություն է տարածել՝ նշելով, որ պատգամավորներին անձեռնխելությունից զրկող օրենքի ընդունումից հետո մի շարք քուրդ պատգամավորներ կանչվել են հարցաքննության, բայց նրանք չեն ներկայացել եւ ձերբակալվել են: Նրանց հիմնականում «ահաբեկչական կառույցի անդամ լինելու» կամ «ահաբեկչական կառույցի անդամ չլինելով՝ այդ կառույցի օգտին քարոզչություն անելու» մեղադրանքներ են առաջադրվել: Երեք պատգամավորի նոյեմբերի 4-ի երեկոյան ազատ են արձակել, իսկ կուսակցության համանախագահներն ու մյուս պատգամավորները՝ 8 անձ, դատարանի որոշմամբ կալանավորվել են։

Խոշոր վթար Եղվարդի խճուղում: Իրար են բախվել երկու «Mercedes» եւ մեկ «Opel» մակնիշի ավտոմեքենաներ: 7 տուժածներ տարբեր աստիճանի վնասվածքներով Երեւանի հիվանդանոցներ են տեղափոխվել: Տուժածներից մեկի վիճակը ծայրահեղ ծանր է, մյուսներինը՝ միջին ծանրության: 

Նոյեմբերի 4-ին դոլարը շարունակել է ամրապնդել դիրքերը: Արդյունքում դոլարի փոխարժեքը կազմել է 476 դրամ, եվրոյինը՝ 529, ռուբլունը՝ 7 դրամ 49 լումա, ֆունտինը՝ 595 դրամ։

Նոյեմբերի 5-ին հանրապետության տարածքում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: